Մենք ենք կորոնավիրուսի հետ կռիվ տալիս, բայց ուշադրության արժանի չենք. Մարալիկի ծննդատան աշխատակից (տեսանյութ)

ԵՐԵՎԱՆ, 21 ՕԳՈՍՏՈՍԻ, Tert.am: Մարալիկի հիվանդանոցը եղել է այն հաստատությունը, որն սպասարկել է և՛ Ախուրյանի շրջանի բնակչությանը, և՛ Արթիկի, և՛ Թալինի, և՛ Մարալիկի, իսկ այսօր խայտառակ իրավիճակ է, փոխանակ բացեն բաժանմունքը, որը 2017 թվականին փակեցին, այսօր փակում են ծննդատունը: Այս մասին այսօր լրագրողների հետ զրույցում ասաց Մարալիկի ծննդատան աշխատակիցներից մեկը՝ խոսելով Մարալիկի ծննդատան փակվելու մասին որոշման և 7 ամիս աշխատավարձ չստանալու մասին:

Հիշեցնենք, որ ՀՀ առողջապահության նախարարության որոշմամբ ՀՀ մարզային մի շարք բուժհաստատությունների ֆինանսավորումը դադարեցվում է, որի հետևանքով մարզային մի շարք ծննդատներ փակվում են։

Ըստ այդ որոշման՝ ծննդատների ծնունդների թիվը պետք է հասնի 150-ի և 150-ից պակաս լինելու դեպքում ծննդատները պետք է լուծարվեն։ Մարալիկի ծննդատան աշխատակիցները պայքարեցին ծննդատան փակվելու դեմ, որի արդյունքում ծննդատունը չփակվեց, սակայն այլևս չի ֆինանսավորվում:

«Ի՞նչ աբսուրդ երևույթ է, քանի կար՝ աշխատատեղ էին ավելացնում, ի՞նչ եղավ հանկարծ, հաստատվեցին աթոռներին և եղածն էլ փակում են ու քանի գործազուրկ ընտանիք է մնում: Քանի ամիս է՝ կորոնավիրուսն է մոլեգնում Հայաստանում, ու այս ամենի ծանրությունն առաջնահերթ ընկել է շտապօգնության վրա, բայց նրանց աշխատանքին Կառավարությունն արձագանք չի տվել: Հիմա պարգևավճարները նախարարներին և մյուսներին են տվել, բայց այս օրով մենք ուշադրության արժանի չենք, մենք ենք կորոնավիրուսի հետ կռիվ տալիս: Ոչ մի խրախուսական քայլ չի արվել, մենք պարգևավճար ենք ստացել Սամվել Կարապետյանից, իսկ նախարարությունից թքած ունեն»,– ասաց նա:

Մանրամասները՝ տեսանյութում: