Եվրամիության հետ հարաբերությունները չեն խանգարի Ռուսաստանի հետ կապերին. Է. Նալբանդյան
Նմանատիպ
Մաքսային Միությանը միանալու որոշումը Հայաստանը կայացրել է՝ հաշվի առնելով Ռուսաստանի հետ սերտ համագործակցությունը ամենատարբեր ոլորտներում: Այս մասին սեպտեմբերի 13-ին Արեւելյան գործընկերության ծրագրի արտգործնախարարների ոչ պաշտոնական հանդիպման շրջանակում կայացած ասուլիսի ժամանակ ասաց ՀՀ արտաքին գործերի նախարար Էդվարդ Նալբանդյանը՝ պատասխանելով գերմանացի լրագրողի հարցին: «Մենք Եվրոպական Միության հետ բանակցությունները սկսելուց առաջ մեր եվրոպացի գործընկերներին հստակ ասել ենք, որ պատրաստ ենք բոլոր հնարավոր եղանակներով խորացնել մեր հարաբերությունները Եվրամիության հետ, սակայն դա ոչ մի կերպ չպետք է խանգարի Ռուսաստանի հետ մեր հարաբերություններին»,- ասաց նա:
Էդվարդ Նալբանդյանն ընդգծեց, որ Հայաստանը շարունակելու է բանակցությունները ԵՄ-ի հետ հարաբերությունները խորացնելու ուղղությամբ: «Մենք մեր եվրոպացի գործընկերներին արդեն տեղեկացրել ենք, որ պատրաստ ենք շարունակել համագործակցությունը եւ կյանքի կոչել բարեփոխումների այն ծրագրերը, որ մենք երկար տարիների ընթացքում մշակել ենք եվրոպացի գործընկերների հետ»,- ասաց ՀՀ ԱԳ նախարարը:
Սեպտեմբերի 3-ին Մոսկվայում ՌԴ նախագահ Վլադիմիր Պուտինի հետ հանդիպումից հետո ՀՀ նախագահ Սերժ Սարգսյանը հայտարարեց, որ Հայաստանը պատրաստվում է միանալ Մաքսային միությանը եւ մասնակցել Եվրասիական միության ձեւավորման գործընթացին: Միեւնույն ժամանակ, Սերժ Սարգսյանը հայտարարել է, որ այդ որոշումը չի նշանակում, որ Հայաստանը դադարեցնում է հարաբերությունները ԵՄ-ի հետ:
Հետևեք մեզ նաև Telegram-ում