Բելառուսից Հայաստանի է ներկրվել 100 տրակտոր, որոնք առաջիկայում գյուղացիներին կտրամադրվեն լիզինգով կամ ուղղակի վաճառքով: Այդ մասին մարտի 5-ին հրավիրված ասուլիսում հայտնեց ՀՀ գյուղատնտեսության փոխնախարար Ռոբերտ Մակարյանը:
Նա հիշեցրեց, որ նախորդ տարի Բելառուսից Հայաստանի Հանրապետություն են ներկրվել 120 տրակտոր, որոնք ամբողջությամբ սպառվել են: «Երեկ արդեն տրակտորների նոր խմբաքանակ է ներկրվել Հայաստան, և մաքսային ձևակերպումները կատարելուց հետո, այս երկու օրվա ընթացքում կվաճառվի գյուղացիներին լիզինգով և ուղղակի վաճառքով», – «Արմենպրես»-ի հաղորդմամբ, նշեց Մակարյանը:
ՀՀ Ազգային վիճակագրական ծառայության տվյալներով, 2014 թվականի հունվարի 1-ի դրությամբ Հայաստանում հաշվառված է 14 հազար 783 տրակտոր, որոնցից սարքին վիճակում են 11 հազար 656-ը:
