Մամուլն այսօր. «Կոմիտաս ծնած ազգն իրավունք չունի իրեն թույլ տալ եվրոպական մշակութային աղբամանից օգտվելու շռայլությունը»

Ընտրություններ.

«Ժողովուրդ»-ի տեղեկություններով` «Օրինաց երկիր» կուսակցության համամասնական ցուցակում լինելու է նաև ՕԵԿ մամլո խոսնակ Սուսաննա Աբրահամյանը: Ըստ թերթի տեղեկությունների` Աբրահամյանը ցուցակում լինելու է երկրորդ կինը` Հեղինե Բիշարյանից հետո: Սուսաննւս Աբրահամյանը, սակայն, «Ժողովուրդ»-ի հետ զրույցում ասել է, թե նման բան չկա. «Դա Ձեր սեփական կարծիքն է ու Ձեր տեսակետը: ՕԵԿ-ի ցուցակը դեռևս քննարկման փուլում է գտնվում: Առաջիկայում ՕԵԿ-ի համագումարն է, որի ժամանակ կհրապարակվի ցուցակը, ինչի մասին նաև Դուք կտեղեկանաք»: Թերթը հիշեցնում է, որ ՕԵԿ-ի համագումարը տեղի կունենա մարտի 3-ին:

ԱԺ «Բարգավաճ Հայաստան» խմբակցության պատգամավոր Ռոբերտ Թովմասյանը, որ 2007-ին պատգամավոր էր ընտրվել Կոտայքի մարզի թիվ 26 ընտրատարածքից, երեկ «Հայկական ժամանակ» թերթին ասել է, որ մեծամասնականով չի առաջադրվելու և չի ընդգրկվելու ԲՀԿ համամասնական ցուցակում: Պատճառն էլ, ըստ նրա, այն է, որ ուզում է զբաղվել բիզնեսով: Թերթին հայտնի է դարձել, որ ԲՀԿ-ն որոշել է այդ ընտրատարածքում մեծամասնական ընտրակարգով առաջադրել գործող պատգամավոր Մելիք Մանուկյանի թեկնածությունը, որը նախորդ ընտրություններում Աժ էր մտել Կոտայքի մարզի թիվ 27 ընտրատարածքից. նա ի սկզբանե չէր ուզում մեծամասնականով առաջադրվել և փորձում էր Աժ անցնել ԲՀԿ համամասնական ցուցակով: 27-ում էլ, ըստ թերթի տեղեկությունների, ԲՀԿ-ն առաջադրելու է կուսակցության նախագահ Գագիկ Ծառուկյանի խնամու` Մուրադ Գուլոյանի թեկնածությունը, որը 2007-ին պատգամավոր էր դարձել ԲՀԿ համամասնական ցուցակով: Ի դեպ, Կոտայքի մարզի մյուս ընտրատարածքում էլ` թիվ 25-ում (սա Հրազդանը ներառող ընտրատարածքն է), ԲՀԿ-ն առաջադրելու է Դավիթ Քոչարյանի թեկնածությունը, որը տակավին անհայտ դեմք է քաղաքական դաշտում:

«Հրապարակ»-ը գրում է, որ «Օրինաց երկիր» կուսակցության փոխնախագահ Հեղինե Բիշարյանը չի բացառել, որ ինքը մեծամասնական ընտրակարգով կարող է առաջադրվել Մալաթիա–Սեբաստիայի թիվ 8 ընտրատարածքից. «Քաղաքական խորհրդի վերջնական որոշման արդյունքում մենք կհրապարակենք այդ որոշումը, բայց ես վճռական եմ մեծամասնական ընտրակարգով մասնակցելու հարցում»,- ասել է Բիշարյանը` հավելելով. «Ողջ համայնքը չի կարող լինել մի ընտանիքի սեփականություն»:

Թերթը նաև հայտնում է, որ վերջին շրջանում հակասական տեղեկություններ են հայտնվել «Սիլ գրուպ» կոնցեռնի հիմնադիր, Աժ նախկին պատգամավոր Խաչատուր Սուքիասյանի` առաջիկա խորհրդարանական ընտրություններին մասնակցության վերաբերյալ: Նախ գրվեց, որ չի առաջադրվելու, ապա նրա եղբայր Սարիբեկ Սուքիասյանը հայտարարեց, որ եղբայրը թերևս կառաջադրվի: Երեկ թերթի թղթակցի հարցմանն ի պատասխան` «Սիլ գրուպ» կոնցեռնի մամուլի խոսնակ Աննա Մկրտչյանը հայտնել է, որ Խաչատուր Սուքիասյանն այժմ գործուղման է Չինաստանում և միայն երկու օրից վերադառնալուց հետո անձամբ կհայտարարի իր առաջադրվելու մասին: Ի դեպ, այս ընտրատարածքում արդեն իսկ իր առաջադրման մասին հայտարարել է «Նուշիկյան» ասոցիացիայի նախագահ Գարեգին Նուշիկյանը:

Ի՞նչ ունի Հայաստանն այսօր.

«Ազգ» օրաթերթը գրում է. «Հայաստանում այսօր հաշվառված է 670 հանքավայր, այդ թվում` 30 մետաղական: Նշված հանքերից շահագործվում է 400-ը, ներառյալ` 22 մետաղական: Հանրապետության ընդերքը հարուստ է երկաթով, պղնձով, մոլիբդենով, ոսկիով, ցինկով, արծաթով, ալյումինով: Հայաստանում կան 7 պղնձամոլիբդենային, 4 պղնձի, 14 ոսկու, 2 բազմամետաղային, 2 երկաթահանքային և 1 ալյումինահանքային հանքավայրեր: Հայաստանում այսօր գործում է 15 պոչամբար, որոնց ծավալներն անցնում են մի քանի միլիոն խորանարդ մետրից և զբաղեցնում 700 հա ընդհանուր մակերես: Պոչամբարներում կուտակված օգտակար հանածոների արդյունահանման և վերամշակման արդյունքում առաջացած արտադրական թափոնները չեն օգտագործվում, չնայած դրանք պարունակում են մեծ քանակությամբ բազմամետաղներ: Բնապահպաններն ահազանգում են, որ պոչամբարները կարող են հատկապես վտանգավոր լինել ուժեղ երկրաշարժերի ժամանակ: Հանքերի շահագործման ընթացքում գոյացած միլիոնավոր տոննաների հասնող արդյունաբերական թափոնները լուրջ վտանգ են շրջակա միջավայրին: Թեպետ Հայաստանը սեյսմիկ գոտի է համարվում, թափոնների առաջացած ռիսկերի գնահատում պետությունը չի կատարել: Պոչամբարները հատկապես վտանգավոր են, որովհետև գտնվում են բնակավայրերի, արոտավայրերի, ջրային աղբյուրների հարևանությամբ, հասցրած վնասն էլ կարող է լինել անդառնալի:

Թափոնների վերաբերյալ վերջին հետազոտությունը կատարվել է 2008-ին: Համաձայն բնապահպանության նախարարության պաշտոնական կայքէջի, այդ թվականին Հայաստանում առաջացել է 11,5 միլիոն տոննա թափոն: Ըստ թերթի` հաշվի առնելով, որ հանքարդյունաբերությունը Հայաստանում զարգանում է մեծ թափով, ապա կարելի է պնդել, որ հաջորդ չորս տարիներին թափոնների քանակը Հայաստանում եթե չի ավելացել, ապա չի էլ նվազել: Թափոնների առյուծի բաժին 90 տոկոսն առաջացել է Սյունիքի մարզում: Հանրապետության հարավում են գտնվում խոշորագույն հանքերը: Փատորեն մեկ բնակչի հաշվով առաջացած թափոնների քանակը կազմել է 3,5 տոննա: Մեկ շնչին ընկնող թափոնների քանակով Հայաստանը համարվում է ռեկորդակիր և զբաղեցնում առաջին հորիզոնականը»:

«Հայկական ժամանակ»-ը ներկայացնում է պաշտոնական տվյալները՝ գրելթվ, որ 2011 թվականի դեկտեմբերի 31-ի դրությամբ` ՀՀ պետական պարտքը կազմել է 1 տրիլիոն 592 միլիարդ 712 միլիոն դրամ կամ մոտ 4 միլիարդ 137 միլիոն դոլար: Դրանից 3 միլիարդ 568 միլիոն դոլարը արտաքին պարտքն է:

Միայն անցած տարվա ընթացքում ՀՀ արտաքին պարտքը աճել է 270 միլիոն դոլարով կամ ավելի քան 8 տոկոսով: Ներքին պարտքը աճել է 36 միլիարդ դրամով կամ մոտ 93 միլիոն դոլարով: Այսպիսով, ՀՀ պետական պարտքը աճել է 363 միլիոն դոլարով: Այլ կերպ ասած, ՀՀ կառավարությունը անցած տարվա ողջ ընթացքում օրական վերցրել է մեկ միլիոն դոլարի պարտք` ներառյալ շաբաթ–կիրակի օրերը: Հաշվի առնելով մարդահամարի վերջին տվյալները` Հայաստանի յուրաքանչյուր քաղաքացի, անկախ իր կամքից, պարտք է 1480 դոլար:

Զարմանազան.

«Իրավունք» թերթը գրում է. «Օրերս, առիթ ենք ունեցել ուսումնասիրելու բավականին հետաքրքրական տեսանյութեր, որոնց հեղինակը, օգտագործելով ձայնագրության դանդաղեցման տեխնոլոգիան, ցույց է տվել, որ «Սուրբ Հոգով» լեզուներով խոսելիս «Կյանքի խոսք» աղանդի հայաստանյան մասնաճյուղի պարագլուխ Արթուր Սիմոնյանը, իրականում, արտաբերում է որոշակի ծիսական ֆրազներ մաքուր իտալերենով: Եվ այդ ֆրազները վերաբերում են բազում հին ու նոր կրոններին:

Իսկ թե ինչպե՞ս է այդ «լեզուներով խոսելու» տեխնոլոգիան ծառայեցվում համաշխարհային միասնական կրոն ստեղծելու ծրագրին և ինչո՞ւ հատկապես Հայաստանում է այդքան մեծ «Կյանքի խոսքի» ակտիվությունը, կներկայացնենք «Հետաքննության» առաջիկա համարում»:

«Ժողովուրդ»-ը տեղեկացել է, որ Աժ նախագահի մշակութային հարցերով խորհրդատուի պաշտոնում է նշանակվել հեռուստասերիալի դերասանուհի Մերի Փայտյանը: Ուշագրավն այն է, որ Նիկոյանի խորհրդատուն սերիալներում կատարում է հիմնականում երկրորդական դերեր: Թե ինչ խորհուրդներ է տալու դերասանուհին Նիկոյանին, անհասկանալի է. երկու օր է` Աժ-ում նրան հանդիպելու թերթի փորձերն ապարդյուն են անցել: Թերթի աղբյուրների փոխանցմամբ` Փայտյանը հազվադեպ է աշխատանքի գալիս:

Անդրադառնալով «Եվրատեսիլ»-ին մասնակցել-չմասնակցելու հարցին` «Հայոց աշխարհը» գրում է. «Նման իրավիճակում մի դեպք եմ միայն հիշում, երբ մեր ներկայացուցիչը, տվյալ դեպքում` բանաստեղծ Արտեմ Հարությունյանը, մասնակցելով Ստամբուլում կազմակերպված գրական մի խորհրդաժողովի, ուղղակի առանց երկնչելու իր զեկույցում թուրքերի երեսին շրխկացրել էր նրանց գործած ցեղասպանության մասին: Բանաստեղծությամբ, ընդ որում, ոչ միայն իր գրած, այլևւ ժամանակակից ամերիկյան եւ եվրոպական հեղինակների տողերով: 

Վերադառնանք «Եվրատեսիլը» բոյկոտել-չբոյկոտելուն: Ի դեպ, հայ երգիչների բոյկոտել-չբոյկոտելու մասին խոսելով՝ «Կարին» համույթի ղեկավար Գագիկ Գինոսյանը շեշտել էր, թե Հայաստանը ոչ միայն Բաքվում տեղի ունենալիք, այլև  բոլոր «Եվրատեսիլները» պետք է բոյկոտի։ Ըստ նրա. «Քաղաքականացված եւ անհասկանալի ճաշակ սերմանող մրցույթները չպիտի պրոպագանդվեն մեր երկրում, հատկապես պետական հեռուստաընկերություններով։ Եվ Կոմիտաս ծնած ազգն իրավունք չունի իրեն թույլ տալ եվրոպական մշակութային աղբամանից օգտվելու շռայլությունը»։