Ռաֆայել Նազարյան. Առաջին կամ երկրորդ տեղ զբաղեցնելու խնդիր չկա

Այսօր «Հրազդան» մարզադաշտի մամուլի ասուլիսների սրահում տեղի ունեցավ Հայաստանի երիտասարդական հավաքականի գլխավոր մարզիչ Ռաֆայել Նազարյանի մամուլի ասուլիսը` Իսլանդիայի հետ խաղից առաջ:

Ռաֆայել Նազարյանը նշեց, որ հավաքականի գլխավոր խնդիրը միջազգային փորձ ձեռք բերելն է և լավագույն ֆուտբոլիստներին արտասհմանյան ակումբներում խաղալու հնարավորություն ընձեռնելը:

-Սա ինձ համար առաջին փորձությունը չէ, արդեն երկրորդ մրցափուլն է, և ես որոշակի փորձ  ունեմ: Մենք պատրաստ ենք, սակայն վատ է, որ չկարողացանք ընկերական հանդիպում անցկացնել: Առաջին կամ երկրորդ տեղ զբաղեցնելու խնդիր կոնկրետ չկա, բայց տրամադրված ենք հաղթանակի,-ասաց Ռ. Նազարյանը:

Մարզչի կարծիքով` ԵԱ մեր խմբի ֆավորիտը Ֆրանսիայի ընտրանին է, իսկ մյուս թիմերի հնարավորությունները, հավասար են:

-Ապագայում մենք ավելի շատ կփորձենք ընկերական հանդիպումներ անցկացնել, որպեսզի խաղացողներին գործի մեջ ավելի շատ տեսնենք: Ընկերական խաղերի համար մրցակիցներ գտնելը դժվար է:

Ինձ համար ամենակարևորը խաղի որակն է: Բայց երբ խաղում ենք Ֆրանսիայի պես հավաքականի հետ, ես հասկանում եմ, որ մեր խաղի որակը կարող է ընկնել, որովհետև խաղը թելադրում է մրցակիցը: Բայց ես վստահ կարող եմ ասել, որ այսօրվա մեր երիտասարդական թիմը լավն է,- հավելեց Նազարյանը:

Հիշեցնենք, որ Հունիսի 6-ին ժամը 19:00-ին «Հրազդան» մարզադաշտում կկայանա 2015թ. Եվրոպայի երիտասարդական առաջնության Հայաստան-Իսլանդիա ընտրական հանդիպումը: