Բրազիլիան ընդհատեց իսպանական հաղթարշավը և նվաճեց Կոնֆեդերացիաների գավաթը

«Մարականան» ցնծում է. Բրազիլիան Կոնֆեդերացիաների գավաթի խաղարկության հաղթողն է:

Եզրափակիչ Բրազիլիա-Իսպանիա հանդիպմանն ընթացքը շատերի համար էր անակնկալ: Քչերն էին կարծում, որ Աշխարհի և Եվրոպայի գործող չեմպիոնները երեք անպատասխան գնդակ կընդունեն սեփական դարպասը, բայց այսօրվա խաղում Բրազիլիան անկասելի էր:

Հանդիպման հաշիվը երկրորդ րոպեին բացեց Ֆրեդը, առաջին խաղակեսի վերջնամասում գեղեցիկ գոլով աչքի ընկավ Նեյմարը: Երկրորդ խաղակեսի մեկնարկից րոպեներ անց Ֆրեդն առավել տպավորիչ դարձրեց իր թիմի առավելությունը:

55-րդ րոպեին Իսպանիայի հավաքականը հաշիվը կրճատելու և դրանով խաղի մեջ բեկում մտցնելու հիանալի հնարավորություն ուներ, սակայն 11 մետրանոց հարվածը շեղ իրացրեց Սերխիո Ռամոսը:

Նշենք, որ Իսպանիայի հավաքականն իր վերջին պարտությունը կրել էր 2010 թվականի աշխարհի առաջնության խմբային փուլում` Շվեյցարիայից:

Բրազիլիա-Իսպանիա` 3:0

Հեռացում` Պիկե-68-րդ րոպեին: