Բացվել է Ֆրանկոֆոնիայի միամսյակը. Սպասվում են ավելի քան 250 մշակութային միջոցառումներ

Մարտի 15-ին Հայաստանում մեկնարկել է Ֆրանկոֆոնիայի միամսյակը: ՀՀ Արտաքին գործերի նախարարության կողմից համակարգմամբ, ՀՀ Մշակույթի, Կրթության եւ գիտության նախարարությունների, Երեւանի քաղաքապետարանի, Հայաստանի համայնքների միության, Հայաստանում Ֆրանսիայի, Կանադայի, Եգիպտոսի, Լեհաստանի, Ռումինիայի եւ Շվեյցարիայի Համադաշնության դեսպանությունների, Հայաստանի մի շարք համալսարանների եւ ոչ կառավարական կազմակերպությունների աջակցությամբ մշակվել է միջոցառումների ծրագիր:

ԱԳՆ մամլո ծառայության փոխանցմամբ՝ մարտի 15-ից ապրիլի 23-ն ընկած ժամանակահատվածում Երեւանում եւ Հայաստանի մարզերում կկազմակերպվեն ավելի քան 250՝ ֆրանկոֆոնիային նվիրված մշակութային, գեղարվեստական, կրթական եւ բուհական միջոցառումներ:

Այս միջոցառումներին մասնակցություն կունենան հայ, բելգիացի, ֆրանսիացի, կանադացի, լեհ եւ շվեյցարացի մի շարք արվեստագետներ:

Հայաստանում Ֆրանկոֆոնիայի միամսյակի պաշտոնական մեկնարկը կտրվի մարտի 16-ին ժամը 19:00-ին Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնում Ժորժ Բիզեի «Կարմեն» օպերայի բեմադրությամբ:

Այս միջոցառումների ամբողջական ծրագիրը հասանելի է հետեւյալ ինտերնետային կայքէջում` www.mfa.am/francophonie:

Ֆրանկոֆոնիայի օրերի մեկնարկն ազդարարող մամուլի ասուլիսը տեղի կունենա 2012թ-ի մարտի 20-ին, ժամը 15:00-ին Հայաստանում Ֆրանսիայի դեսպանությունում: