Այսօր ԵՄ-ի ընդլայնման և եվրոպական հարևանության քաղաքականության հարցերով հանձնակատար Շտեֆան Ֆյուլեն Բաքվում կայացած բրիֆինգի ժամանակ անդրադարձել է մի շարք հարցերի, հաղորդում են ադրբեջանական լրատվամիջոցները:
«Եվրամիությունն աջակցում է ԵԱՀԿ Մինսկի խմբի ջանքերին: Դա երևում էր ԵՄ-ի վերջին հայտարարությունից: Հետևաբար, Ֆրանսիայի մանդատի փոխարինումը քննարկման ենթակա չէ»,- ասել է Շ.Ֆյուլեն՝ մեկնաբանելով ԵԱՀԿ ՄԽ-ում Ֆրանսիայի մանդատի՝ ԵՄ-ով փոխարինման հարցը:
Հիշեցնենք, որ մասնավորապես ադրբեջանական մամուլում էր շրջանառվում այն տեղեկատվությունը, թե Եվրախորհրդարանը պատրաստվում է քննել վերոնշյալ հարցին առնչվող որևէ օրինագիծ: Հայ և միջազգային մի շարք փորձագետներ գտնում են, որ նման փոփոխությունը քիչ հավանական է, քանի որ Ֆրանսիան ինքնին հանդիսանում է ԵՄ անդամ: Բացի այդ, ԵՄ-ն ԵԱՀԿ ՄԽ գործունեությունն արդյունավետ է գնահատում և պարզապես մշտական աջակցություն է ցուցաբերում:
