Մարզերի ռուսերենի ուսուցիչները մասնակցել են վերապատրաստման դասընթացի
![Մարզերի ռուսերենի ուսուցիչները մասնակցել են վերապատրաստման դասընթացի](https://times.am/v3/wp-content/uploads/2023/01/ԴՄ-1200-1024x551.jpg)
Նմանատիպ
Երևանում «Դոմ Մոսկվի» մոսկովյան մշակութագործարարական կենտրոնը նախաձեռնել էր ուսուցիչների որակավորման բարձրացման սեմինար, որին մասնակցում էին Հայաստանի տարբեր մարզերում կենտրոնի կողմից կազմակերպվող ռուսաց լեզվի անվճար դասընթացները վարող ուսուցիչները։
«Լեզվաբանության և դասավանդման մեթոդիկայի արդի միտումները» թեմայով դասընթացին մասնակցում էին ավելի քան 50 ուսուցիչներ ՀՀ տարբեր մարզերից: Վերապատրաստման դասընթացը անցկացնում էին Ռուսաստանի և Հայաստանի առաջատար մասնագետները, որոնք մասնակիցներին ներկայացրեցին ուսուցման ժամանակակից, ինտերակտիվ մեթոդների և ուսումնական գործընթացի կազմակերպման նրբությունները:
Երևանում «Դոմ Մոսկվի» կենտրոնի գլխավոր տնօրեն Վահրամ Կարապետյանը շնորհակալություն հայտնեց ուսուցիչներին մասնագիտությանը անմնացորդ նվիրումի համար:
«Անգնահատելի է ուսուցիչների ներդրումը երեխաների կրթության և դաստիարակության, հետևաբար հասարակության զարգացման գործում։ Ուսուցիչները երեխաների համար բացում եք գիտելիքների աշխարհը, օգնում հասկանալ կյանքի իմաստությունը: «Դոմ Մոսկվի» կենտրոնը կփորձի անել հնարավորը այս կարևոր առաքելության մեջ: Հուսով ենք, որ մեր կողմից կազմակերպվող վերապատրաստման դասընթացները, ներկայացված մեթոդական ձեռնարկներն ու նյութերը կնպաստեն, որպեսզի երեխաները լավ տիրապետեն առարկային և սիրեն ռուսաց լեզուն և մշակույթը», – նշեց Երևանում «Դոմ Մոսկվի» կենտրոնի գլխավոր տնօրեն Վահրամ Կարապետյանը։
Ուսուցիչներին ողջունեց նաև հայտնի ջութակահար Կարեն Շահգալդյանը, ով ընդգծեց ուսուցչի կարևոր և պատասխանատու դերը յուրաքանչյուրի կյանքում։ Ողջույնի խոսքով ներկայացավ նաև Հայրենական մեծ պատերազմի վետերան, ՀՀ վաստակավոր ուսուցիչ Ռոզալիա Աբգարյանը:
«Չափազանց կարևոր է ուսուցչի դերը երեխայի դաստիարակության և արժանապատիվ քաղաքացի ձևավորման գործում։ Հենց ուսուցիչներից է կախված ոչ միայն երեխաների, այլև երկրի ճակատագիրը»,- նշեց Ռոզալիա Աբգարյանը:
«Անցած տարվա դեկտեմբերին հերթական դասընթացն էր։ Ամեն անգամ Հայաստան այցելելիս հիանում եմ հայ մանկավարժների նվիրումով։ Միշտ պատրաստ ենք աջակցել նման նախաձեռնություններին։ Վստահ եմ, որ մեր գործակցությունը շարունակական կլինի և լավ արդյունքներ կտա», – ընդգծեց Ռուսաստանի պետական համալսարանի բանասիրության տեխնոլոգիաների ամբիոնի պրոֆեսոր, «Ալֆա-Դիալոգ» կենտրոնի տնօրեն Ելենա Յադրովսկայան, ով ներկաներին ներկայացրեց մասնագիտական դասախոսություն։
Դասընթացի ավարտին մասնակիցները ստացան սերտիֆիկատներ։
«Դոմ Մոսկվի» կենտրոնը ռուսաց լեզվի անվճար երկամսյա դասընթացներն իրականացնում է 2019թ․-ից։ Դասընթացների աշխարհագրությունն ընդգրկում է ՀՀ 11 մարզեր և 44 համայնքներ, աշխարհագրությունը ընդլայնվում է։
Հետևեք մեզ նաև Telegram-ում