Նետաձգության Եվրոպայի առաջնություն. Նազիկ Ամիրյանը գոհ չէ արդյունքներից
Նմանատիպ
Հայաստանի նետաձգության ֆեդերացիայի նախագահ Նազիկ Ամիրյանը կարծում է, որ հայ մարզիկները կարող էին ավելի լավ հանդես գալ «Արա և Այծեմնիկ» մարզական ակումբում անցկացվող Նետաձգության Եվրոպայի 21-րդ առաջնությունում:
«Թեև Գոհար Շահնազարյանը 2015թ. Բաքվում կայանալիք Եվրոպայի ամառային խաղերի ուղեգիր նվաճեց, մեր մարզիկների ընդհանուր արդյունքներից գոհ չեմ, քանի որ ավելի մեծ սպասելիքներ ունեի»,-ասաց Ն. Ամիրյանը լրագրողների հետ հանդիպման ժամանակ:
Ըստ ֆեդերացիայի նախագահի՝ հատկապես մեծ սպասելիքներ կային տղաներից, թեև արդյունքում հավաքականի լավագույն ցուցանիշը գրանցեց Գոհար Շահնազարյանը:
«Մեր սպասելիքները հիմնականում տղաներից էին: Գոհար Շահնազարյանը մարզումները սկսել էր գարնանից: Նա թևի վնասվածք ուներ, և չէինք սպասում, որ կկարողանա այդքան լավ հանդես գալ: Տղաների դեպքում հակառակը տեղի ունեցավ: Մեր գլխավոր հավակնորդը’ Վասիլ Շահնազարյանը, մրցումներից առաջ մատների վնասվածք ստացավ և դժվարությամբ էր ելույթ ունենում»,-ասաց Ն. Ամիրյանը:
Անդրադառնալով Գ. Շահնազարյանի՝ 2015թ Բաքվում կայանալիք Եվրոպայի ամառային խաղերի ուղեգիր ստանալուն՝ Ն. Ամիրյանը նշեց, որ դեռևս պարզ չէ՝ արդյոք մարզուհին կմասնակցի, թե՝ ո՛չ. «Չեմ կարող ասել՝ կգնա նա, թե՝ ո՛չ: Դա մեկ հոգու որոշելու բան չէ»:
Այս առաջնությունում Հայաստանը ներկայացնում էին 6 մարզիկներ: Նրանցից 5-ը պայքարը լքեցին 1/48 եզրափակչում: Գոհար Շահնազարյանը պարտվեց 1/24 եզրափակչում՝ ճանապարհը զիջելով Ալիսիա Մարինին (Իսպանիա), սակայն սփոփիչ մրցափուլում նա կարողացավ Եվրոպական ամառային խաղերի ուղեգիր նվաճել:
Հետևեք մեզ նաև Telegram-ում