30-100 հազար դրամ տուգանք` ՀՀ պետական դրոշի նկատմամբ պահանջները խախտելու դեպքում

ԱԺ արտահերթ նիստի ընթացքում ՀՀ արդարադատության նախարարի տեղակալ Արմենուհի Հարությունյանը, ներկայացնելով «Դրոշի մասին» և «Վարչական իրավախախտումների մասին» ՀՀ օրենքներում փոփոխություններ կատարելու մասին նախագծերի փաթեթը, առաջարկել է սահմանել 30-100 հազար դրամի տուգանք անխտիր բոլորին, եթե խախտեն ՀՀ խորհրդանիշներից մեկի` դրոշի նկատմամբ պահանջները։

Նախարարությունն առաջարկել է դրոշի նկատմամբ պահանջների խախտումները պատժելի դարձնել բոլոր դեպքերում` անկախ նրանից` այն բարձրացված է պետական շենքի վրա, թե տեղադրված է մեկ այլ վայրում։ Ըստ նախագծի` կարգի պահպանմամբ պետք է մեր պետական խորհրդանիշների նկատմամբ հարգանքի մշակույթ ստեղծենք։

«Դրոշը պետք է լինի ամբողջական, չգունաթափված և մաքուր, գետնից 2.5 մետր բարձրության վրա։ Պահանջները չկատարելու դեպքում կսահմանվի 30-50 հազար դրամ տուգանք հասարակ քաղաքացիների, իսկ 70-100 հազար դրամ տուգանք` պաշտոնատար անձանց համար»,- ընդգծել է փոխնախարարը։

Ըստ նրա` վարչական պատասխանատվության տակ չեն ընկնում այն անձինք, որոնք պետական դրոշը տեղադրել են աշխատասենյակներում, փակցրել են մեքենաների վրա։

Միաժամանակ Հարությունյան զգուշացրել է` եթե մշակութային, սպորատային, կրթական այլ հաստատություններում կամ համայնքային կառույցներում դրոշի նկատմամբ պահանջների խախտումներ արձանագրվեն, ապա դա կարող է հանգեցնել ընդհուպ մինչև աշխատանքային պայմանագրի լուծման։