ԱՄՆ-ի պատմության մեջ առաջին անգամ դատապարտյալին մահապատժի կենթարկեն՝ ստիպելով ազոտ շնչել

ԱՄՆ-ի պատմության մեջ առաջին անգամ կիրականացվի մահապատիժ՝ ազոտային գազի օգտագործմամբ: Դա տեղի կունենա հունվարի 25-ին. Ալաբամայի դատարանը մահապատիժը չի արգելել, գրում է ՌԻԱ Նովոստին:

Մահապատժի է ենթարկվելու մի տղամարդ, որը դատապարտվել է 35 տարի առաջ՝ քահանայի կնոջ սպանության համար. սպանության պատվիրատուն ամուսինն էր, որն ակնկալում էր պարտքերը մարելու համար ապահովագրության վճարումներ ստանալ։

Մեկ տարի առաջ ԱՄՆ իշխանությունները փորձել են դատապարտյալին մահապատժի ենթարկել մահացու ներարկումով, բայց փորձն անհաջող էր: Նրանց չէր հաջողվել հասնել նրա երակին: Սպասվում է, որ հունվարի 25-ին նրան կստիպեն միայն ազոտ շնչել, ինչը հիպոքսիա և մահ կառաջացնի։

Այս մեթոդի կողմնակիցները պնդում են, որ այն անցավ գործընթաց է, մինչդեռ հակառակորդները այն համեմատում են մարդկանց վրա փորձեր կատարելու հետ։ Նման մահապատիժները թույլատրված են ամերիկյան 3 նահանգում՝ Ալաբամայում, Օկլահոմայում և Միսիսիպիում։