«Օպենհայմերը» 7 մրցանակ է շահել Բրիտանական կինոյի և հեռուստատեսային արվեստների ակադեմիայի մրցանակաբաշխությունում

Լոնդոնում կայացել է Բրիտանական կինոյի և հեռուստատեսային արվեստների ակադեմիայի (BAFTA) 77-րդ մրցանակաբաշխությունը։ Մրցանակի դափնեկիր է դարձել Քրիստոֆեր Նոլանի «Օպենհայմեր» ֆիլմը, որն արժանացել է յոթ մրցանակի։ Այս մասին հայտնում է Variety-ն։

«Օպենհայմերը» պատմում է ամերիկացի ֆիզիկոս Ռոբերտ Օպենհայմերի մասին, ում ղեկավարությամբ ստեղծվել է ատոմային ռումբը Երկրորդ համաշխարհային պատերազմի ժամանակ։ Ֆիլմը թողարկվել է 2023 թվականին։ Գիտնականին մարմնավորել է դերասան Սիլիան Մերֆին։ BAFTA մրցանակաբաշխության ժամանակ ֆիլմը ստացել է մրցանակներ «Լավագույն ֆիլմ», «Լավագույն ռեժիսոր», «Լավագույն դերասան» (Սիլիան Մերֆի), «Լավագույն երկրորդ պլանի դերասան» (Ռոբերտ Դաունի կրտսեր), «Լավագույն երաժշտություն», «Լավագույն կինեմատոգրաֆիա» և «Լավագույն մոնտաժ» անվանակարգերում։ Ընդհանուր առմամբ ֆիլմն առաջադրվել է 13 մրցանակի։

Ելույթ ունենալով մրցանակաբաշխության ժամանակ՝ Քրիստոֆեր Նոլանը իր ելույթը նվիրել է միջուկային զինաթափման համար պայքարող մարտիկներին։ «Ուզում եմ ասել, որ մեր ֆիլմն ավարտվում է կտրուկ անհրաժեշտ, իմ կարծիքով, հուսահատության նոտայով։ Բայց իրական աշխարհում կան բազմաթիվ մարդիկ և կազմակերպություններ, ովքեր երկար ու ջանասիրաբար պայքարել են աշխարհում միջուկային զենքի քանակը նվազեցնելու համար: 1967 թվականի իրենց գագաթնակետից ի վեր, նրանք դրան հասել են գրեթե 90%-ով։ Վերջին շրջանում շատ բան չի ընթանում ըստ պլանի։ Եվ այսպես, ընդունելով այս մրցանակը՝ ես ուղղակի ուզում եմ իմ երախտագիտությունը հայտնել նրանց ջանքերի համար և նշել, որ նրանք շարունակում են ցույց տալ խաղաղության հասնելու ջանքերի անհրաժեշտությունն ու ներուժը»,- ասաց ռեժիսորը։