Իսրայելը պատրաստակամություն է հայտնել վերանայել Լիբանանի հետ ցամաքային սահմանը
Կարդացեք նաև
Իսրայելը բանակցությունների ընթացքում առաջին անգամ պատրաստակամություն է հայտնել քննարկել Լիբանանի հետ միջազգային ցամաքային սահմանի վերանայման հնարավորությունը։ Այս մասին հայտնում է լիբանանյան Nida Al Watan թերթը՝ հղում անելով իր աղբյուրներին։
Հաղորդվում է, որ Հռոմում կայացած բանակցությունների ընթացքում լիբանանյան պատվիրակությունը պահանջել է վերականգնել հրադադարի ռեժիմը և դադարեցնել, Բեյրութի պնդմամբ, Իսրայելի կողմից թույլ տրվող խախտումները։ Ըստ աղբյուրների՝ այս հարցը ներկայացվել է որպես առաջնահերթություն և պետք է քննարկվի քաղաքական մակարդակով։
Նույն աղբյուրների փոխանցմամբ՝ ամերիկացի ներկայացուցիչները աջակցել են Լիբանանի դիրքորոշմանը՝ նշելով, որ հրադադարի պահպանումը հետագա բանակցությունների առաջընթացի անհրաժեշտ նախապայման է։
Թերթի տեղեկություններով՝ հանդիպման ընթացքում իսրայելական պատվիրակությունը փոխել է իր նախկին դիրքորոշումը ցամաքային սահմանի հարցում և պատրաստակամություն հայտնել դիտարկել միջազգային սահմանի վերանայման հնարավորությունը։ Այդ կապակցությամբ լիբանանյան պատվիրակության կազմում ընդգրկվել է նաև միջազգային իրավունքի մասնագետ։
Բացի այդ, Բեյրութն առաջարկել է անցնել նոր փորձնական գոտիների ստեղծման քննարկմանը, սակայն միայն դրանց իրականացման մեխանիզմի և տեխնիկական մանրամասների շուրջ համաձայնության հասնելուց հետո։
Լիբանանյան կողմը հանդես է գալիս զգալի տարածք ընդգրկող փորձնական գոտիների ստեղծման օգտին և պնդում է, որ անհրաժեշտ է նախապես սահմանել դրանց գործունեության հստակ կանոններ՝ ապագա համաձայնությունների իրագործման ընթացքում տարաձայնություններից խուսափելու նպատակով։
Հետևեք մեզ նաև Telegram-ում