Բաքվում ԱՄՆ բանագնացի հետ քննարկել են դեպի Նախիջևան «անխափան» կապի ու TRIPP նախագծի հարցերը

Ադրբեջանի արտաքին գործերի նախարար Ջեյհուն Բայրամովը հանդիպել է Խաղաղապահ առաքելությունների գծով ԱՄՆ հատուկ բանագնացի ավագ խորհրդական Արյե Լայթսթոունի հետ։ Ադրբեջանական APA գործակալության փոխանցմամբ՝ կողմերը քննարկել են երկկողմ հարաբերությունների ընթացքն ու տարածաշրջանային հարցեր։

Բայրամովն անդրադարձել է 2025 թվականի օգոստոսի 8-ին Վաշինգտոնում տեղի ունեցած գագաթնաժողովին և 2026 թվականի փետրվարի 10-ին ստորագրված Ռազմավարական գործընկերության խարտիային՝ նշելով դրանց շրջանակում ձևավորված աշխատանքային խմբերի գործունեության մասին։

Զրուցակիցները քննարկել են տնտեսական ու էներգետիկ համագործակցությունը, «Միջին միջանցքի» ընդլայնումը և ենթակառուցվածքային ծրագրերը։ Ադրբեջանական կողմը բարձրացրել է TRIPP նախագծի հարցը՝ պնդելով, որ այն պետք է ապահովի Ադրբեջանի տարածքով «անխափան կապ» դեպի Նախիջևանի Ինքնավար Հանրապետություն։

Հանդիպմանն անդրադարձ է կատարվել նաև Հայաստան-Ադրբեջան հարաբերությունների կարգավորման գործընթացին։ Բայրամովը ներկայացրել է Ադրբեջանի դիրքորոշումը տարածաշրջանային կոմունիկացիաների բացման և պայմանավորվածությունների իրականացման վերաբերյալ։

Հետևեք մեզ նաև Telegram-ում