Իրանը սպառնում է հարվածել Մերձավոր Արևելքում գտնվող ամերիկյան ռազմաբազաներին
Կարդացեք նաև
Իսլամական հեղափոխության պահապանների կորպուսը (ԻՀՊԿ) հայտարարել է, որ իրանական կողմը հարվածներ կհասցնի Մերձավոր Արևելքում գտնվող ամերիկյան ռազմաբազաներին, եթե Միացյալ Նահանգները շարունակի աջակցել նավերին՝ օգտագործելու Հորմուզի նեղուցով անցնող և Թեհրանի հետ չհամաձայնեցված երթուղին։ ԻՀՊԿ Ռազմածովային ուժերի հայտարարությունում ընդգծվել է, որ սա լուրջ նախազգուշացում է ամերիկյան կողմին։
Իրանական «Tasnim» լրատվական գործակալության փոխանցմամբ՝ ԻՀՊԿ-ն նշել է, որ ապօրինի և ականապատված երթուղով անցնելու վերաբերյալ ԱՄՆ-ի համառ կոչերը հանգեցնում են նրան, որ ծովում միջադեպերի թիվն օրեցօր ավելանում է։ Ամերիկյան ագրեսորը պետք է հասկանա, որ եթե սա շարունակվի, հակամարտությունը կընդլայնվի և կտարածվի տարածաշրջանում տեղակայված նրանց ռազմաբազաների վրա։
Ավելի վաղ Իրանը հայտնել էր, որ Պարսից ծոցում նավթի փոխադրմամբ զբաղվող չորս նավ ենթարկվել է հրետակոծության, իսկ ևս երեքը պայթել են ականների վրա։ Իսլամական հեղափոխության պահապանների կորպուսը մշտապես հիշեցնում է Օմանի ափամերձ հատվածով անցնող հարավային երթուղու օգտագործման վտանգների մասին՝ շեշտելով, որ Հորմուզի նեղուցը շարունակում է մնալ իրենց ուժերի լիակատար վերահսկողության և մշտադիտարկման տակ։
Հետևեք մեզ նաև Telegram-ում