Լարված իրավիճակ Արտենիում․ բնակիչները բողոքում են դպրոցից Զորավար Անդրանիկի նկարը հեռացնելու դեմ
Կարդացեք նաև
Արագածոտնի մարզի Թալին խոշորացված համայնքի Արտենի բնակավայրում լարված իրավիճակ է ստեղծվել։ Գյուղում արդեն մի քանի օր է անհանգիստ է, քանի որ բնակիչները տեղեկություն էին ստացել, որ Կրթության, գիտության, մշակույթի և սպորտի նախարարության որոշմամբ գյուղի թիվ 1 միջնակարգ դպրոցի պատից պետք է հեռացվի երկար տարիներ այնտեղ գտնվող՝ հատուկ քարերով ստեղծված Զորավար Անդրանիկի պատկերը։
Բնակիչները 2-3 օր շարունակ հերթապահություն են իրականացրել դպրոցի մոտ՝ փորձելով թույլ չտալ նկարի հեռացումը։ Այնուամենայնիվ, հոկտեմբերի 23-ին հատուկ տեխնիկայի միջոցով նկարը հեռացվել է պատից, ինչը մեծ զայրույթ է առաջացրել գյուղացիների շրջանում։
Բնակիչները սպառնացել են դիմել կտրուկ քայլերի և փակել ճանապարհները, սակայն այս պահին ձեռնպահ են մնում՝ սպասելով, թե ինչ որոշում կկայացվի մեծադիր նկարի հետագա ճակատագրի վերաբերյալ։ Գյուղացիներն առաջարկում են, որ եթե նկարը հեռացվել է դպրոցից, այն գոնե տեղադրվի գյուղի՝ Արցախյան պատերազմներում նահատակված հերոսների այգում։
Հետևեք մեզ նաև Telegram-ում