Նիստին ներկայացվեց մանկապարտեզից սկսած բոլոր թղթերը, որ իրենց մեղքը մի փոքր մեղմեն. Նարեկ Մալյան (տեսանյութ)

ԵՐԵՎԱՆ, 3 ՍԵՊՏԵՄԲԵՐԻ, Tert.am: Այսօրվա նիստին տեխնիկական բնույթի գործողություններ իրականացվեցին, մանկապարտեզից սկսած բոլոր թղթերը ներկայացվեցին, որոնք ունեին այդ սորոսականները: Այս մասին այսօր լրագրողների հետ զրույցում ասաց «ՎԵՏՕ» հասարակական շարժման ղեկավար Նարեկ Մալյանը՝ խոսելով իր և «Ռեստարտ» անդամների մասնակցությամբ այսօր տեղի ունեցած դատական նիստի մասին:

Մալյանը նշեց, որ սկզբում չէին թողնում, որ այլ անձիք ներկա գտնվեն դատական նիստին: Նրա խոսքով՝ այն փաստաթղթերը, որոնք «Ռեստարտ»-ի կողմից ներկայացվել են դատարանին, որևէ կարևորություն չունեն: «Ներկայացվեցին փաստաթղթեր, որ իրենց մեղքը մի փոքր մեղմեն: Նիստի ընթացքում ես նրանց անվանեցի «սորոսի վաստակներ», ինչի համար դատարանից նկատողություն ստացա և դատավորն ասաց, որ առանձին թույլ կտա, որ ես իմ տեսակետը հայտնեմ այդ մարդկանց մասին»:

«Նրանք ներկայացրին, որ տևական ժամանակ է՝ ես ճնշում և վատ բաներ եմ ասում իրենց մասին, ես հաջորդ նիստին ցանկանում եմ ասել, որ ոչ միայն վատ բան եմ ասել, այլ շարունակում եմ ասել, շարունակական բնույթ է կրում, չի վերջացել այն գործողությունները, որոնք ես արել եմ նրանց նկատմամբ, պատրաստվում եմ անել մինչև վերջ, դրան վերջ չկա, մինչև բոլոր «սորոսի վաստակներն» ուղղակի վռնդվեն այս երկրից»,- նշեց Մալյանը:

Նա ներկայացրեց, որ հաջորդ նիստին տեղի կունենա իր հարցաքննությունը և տեսանյութերի դիտում կիրականացվի։ Նիստը սեպտեմբերի 16-ին է:

Հիշեցնենք, որ 2019 թվականի մարտի 4-ին «Ռեստարտ» խմբի անդամները հարձակվել էին ՎԵՏՕ շարժման ղեկավար, հասարակական գործիչ Նարեկ Մալյանի վրա՝ իր տան մոտ և փորձել առևանգել։

Հարուցված քրեական գործով մեղադրանք է առաջադրվել «Ռեստարտ» խմբի 6 անդամների՝ Դավիթ Պետրոսյանին, Դավիթ Սիմոնյանին, Արամայիս Պետրոսյանին, Գարիկ Միսկարյանին, Հրաչյա Խլղաթյանին, Յուրի Ավագյանին։

Մանրամասները՝ տեսանյութում։