Իմ պահանջը միակն է՝ Սահմանադրական կարգը տապալելու համար քրեական պատասխանատվության ենթարկել Նիկոլ Փաշինյանին. Կիմ Բալայան (տեսանյութ)

ԵՐԵՎԱՆ, 24 ՆՈՅԵՄԲԵՐԻ, Tert.am: Նշենք, որ ՍԴ նախկին անդամ ԿԻմ Բալայանը Կառավարության դիմաց հացադուլ է անում՝ Նիկոլ Փաշինյանի հրաժարականի և նրան սահմանադրական կարգը տապալելու համար պատասխանատվության ենթարկելու պահանջով:

«Պետք է միջազգային պայմանագիրը գնար Սահմանադրական դատարան, քններ, եթե որոշեր, որ Սահմանադրությունը համապատասխանում է, ապա գնար ԱԺ և նոր վավերացվեր, էլ չեմ ասում, որ վիճահարույց կետեր կան, որը ՍԴ-ն կարող էր գտնել, որ Սահմանադրությանը չի համապատասխանում և պետք է հանրաքվեի միջոցով լուծվի»,- անդրադառնալով զինադադարի հայտարարության կնքմանը՝ նշեց Կիմ Բալայանը:

«Սահմանադրական կարգի տապալումն ակնհայտ է: Իմ հացադուլն ուղղված է նաև գլխավոր դատախազին և Հատուկ քննչական ծառայության ղեկավարին, որոնք մինչև հիմա քրեական գործ չեն հարուցել և քրեական պատասխանատվության չեն ենթարկում, իրենք նույնպես հանցանք են կատարում՝ անգործություն ցուցաբերելով»,-ասաց նա:

Կիմ Բալայանը նշեց, որ հացադուլը կշարունակվի այնքան ժամանակ, մինչև արդյունքի հասնի. «Եթե արդյունքի չհասնեմ, կգնամ կհավասարվեմ այն 5000-ին, որոնք զոհվեցին հանուն հայրենիքի: Ես հասկանում եմ, որ ժողովուրդը ծանր վիճակում է, չկա մի ընտանիք, որ բարեկամ կորցրած չլինի: Փառք եմ տալիս բոլոր զոհվածներին և ափսոսում, որ իրենց տեղը ես չեմ եղել, բայց հանուն հայրենիքի՝ մենք պետք է շարունակենք ճիշտ վարքագիծ դրսևորել, ժողովուրդը պետք է միավորվի և իր ձայնը բարձրացնի, որ իշխանությունը համոզվի, որ այն ժողովուրդը, որ իրեն ընտրել է՝ իրենց դեմ է, և ժամանակն է, որ իրենք հեռանան, որովհետև այս իշխանության երկարաձգումը նշանակում է նոր պարտությունների շարանի սկիզբ»: