Լոպեսի փեսացուն մեղադրվում է խարդախության մեջ (լուսանկարներ)

Հայտնի երգչուհի, պարուհի և դերասանուհի Ջենիֆեր Լոպեսի փեսացուն՝ New York Yankees բեյսբոլի ակումբի նախկին անդամ Ալեքս Ռոդրիգեսը, մեղադրվում է խարդախության և դրամաշորթության համար, գրում է Daily Mail-ը՝ նշելով, որ բեյսբոլիստի դեմ հայց է ներկայացրել նախկին կնոջ եղբայրը՝ Կոնստանտին Սքուտիսը։

Լրագրողների մոտ հայտնված փաստաթղթերում թվարկվում է հանցագործությունների տպավորիչ ցանկ, այդ թվում՝ կեղծ հարկային փաստաթղթերի ներկայացում, ապահովագրության հետ կապված խարդախություն, ռեկետ (խոսքը վերաբերում է Ռոդրիգեսի ու Սքուտիսի ստեղծած անշարժ գույքի կայսրության ենթադրյալ շորթմանը):

Նշենք, որ հայցը, որի շրջանակներում Ռոդրիգեսի նախկին կնոջ եղբայրը 50 մլն դոլար է պահանջում, ներկայացվել է դեռևս 7 տարի առաջ։

Հայտնի է, որ Ռոդրիգեսն ու Սքուտիսն անշարժ գույքի ոլորտում բիզնես են սկսել 2002 թվականին։ Հայցվորի խոսքով՝ «Ռոդրիգեսն իրեն խարդախությամբ դուրս է մղել բիզնեսից և զրկել եկամտից»։

Գործով հաջորդ դատավարությունը տեղի կունենա օգոստոսին։

Աղբյուրը՝ tert.am