NASA-ն ցույց է տվել նյութի նմուշներ Բեննու աստերոիդից

ԱՄՆ-ի Օդագնացության և տիեզերական հետազոտությունների ազգային վարչությունը (NASA) առաջին անգամ ցուցադրել է նյութի նմուշների պատկերներ, որոնք ստացվել են Բենու աստերոիդից Osiris-rex զոնդի միջոցով:

Հատուկ ասուլիսի ժամանակ վարչությունը ցուցադրել է սև հանքանյութեր։ NASA-ի տնօրեն Բիլ Նելսոնի խոսքով՝ նախնական վերլուծությունը ցույց է տվել, որ նմուշները պարունակում են ջուր և ածխածին։ «Ջուրը և ածխածնի մոլեկուլները հենց այն նյութերն են, որոնք մենք ցանկանում էինք գտնել: Սրանք չափազանց կարևոր տարրեր են մեր մոլորակի ձևավորման գործում: Նրանք [նմուշները- խմբ․] կօգնեն մեզ պարզել այն տարրերի ծագումը, որոնք կարող են հանգեցնել կյանքի ծագմանը»,- ընդգծել է NASA-ի ղեկավարը։

Osiris-rex զոնդային պարկուճը Երկիր վերադարձավ Բենու աստերոիդից նյութի նմուշներով սեպտեմբերի 24-ին՝ առաքելության մեկնարկից յոթ տարի անց: Իր ճանապարհորդության ընթացքում զոնդն անցել է մոտ 6,1 միլիարդ կմ։ Osiris-rex-ը հաջողությամբ արձակվել է ուղեծիր 2016 թվականի սեպտեմբերին՝ որպես Բեննու հանդիպման և նմուշների հավաքման առաքելության մի մաս (1999 RQ36): Այն երկնային մարմնին է հասել 2018 թվականի դեկտեմբերի սկզբին։

2020 թվականի հոկտեմբերին զոնդը բարեհաջող վայրէջք կատարեց Բեննուի մակերեսին՝ Nightingale անունով կետում։ NASA-ի ապարատը հավաքել է նյութի նմուշներ և մանրամասն ուսումնասիրել աստերոիդի կառուցվածքն ու հատկությունները հնարավորինս մոտիկից՝ օգտագործելով բորտային սպեկտրոսկոպներ, տեսախցիկներ և այլ գիտական ​​գործիքներ: