Աշխարհի առաջնությունում Մեժլումյանը նվաճել է բրոնզե մեդալ

Ալբանիայի մայրաքաղաք Տիրանայում ընթացող մինչև 23 տարեկան ազատ ոճի ըմբշամարտի աշխարհի առաջնությունում Մեժլում Մեժլումյանը հաղթելով բելառուս Իվան Գրոմիկոյին նվաճեց բրոնզե մեդալ։

Աշխարհի առաջնության մրցումային առաջին օրը հաջողված չէր հայ ըմբիշների համար։ Գորգ դուրս եկած բոլոր հինգ ըմբիշներն էլ պարտվեցին։ Սակայն, քանի որ Մեժլում Մեժլումյանին հաղթած ըմբիշը հասավ եզրափակիչ, մեր ըմբիշին սփոփիչ գոտեմարտի միջոցով հնարավորություն տրվեց պայքարելու բրոնզե մեդալի համար։

Սփոփիչ գոտեմարտում Մեժլումյանը բացահայտ առավելությամբ՝ 11։0 հաշվով պարտության մատնեց ամերիկացի Յուլիան Չլիբովին և իրավունք վաստակեց գոտեմարտելու երրորդ տեղի համար, որտեղ հայ ըմբիշի մրցակիցն էր լինելու Բելառուսի ներկայացուցիչ Իվան Գրոմիկոն։

Այս գոտեմարտում էլ հայ ըմբիշը հաղթանակ տարավ ժամանակից շուտ, ու նորից 11։0 հաշվով։ Այսպիսով Հայաստանի հավաքականն արդեն ունի բրոնզե մեկ մեդալ, երաշխավորված է առնվազն արծաթե մեդալը, քանի որ Մանվել Խնձրցյանը հանդես է գալու եզրափակիչում, իսկ Սերգեյ Սարգսյանը վաղը գոտեմարտելու է բրոնզե մեդալի համար։