Արտուր Աթայանը՝ Կապանի քաղաքապետի ընտրությունների տրոյական ձի

Հոկտեմբերի 2-ին Կապանում կայանալիք քաղաքապետի ընտրություններում հիմնական «պայքարն» ընթանալու է նախկին ու ներկա քաղաքապետներ Արթուր Աթայանի և Աշոտ Հայրապետյանի միջև, չնայած մամուլը բազմից գրել է, որ ՀՅԴ-ն ՀՀԿ-ի հետ ձեռք բերված գաղտնի պայմանավորվածությամբ է առաջադրել Աթայանի թեկնածությունը, քանի որ վերջինս հեղինակություն չունի քաղաքում, հետևաբար, Աշոտ Հայրապետյանի հաղթանակն ավելի հեշտ ու համոզիչ կլինի (Մանրամասները՝ «Ժողովուրդ» թերթում): 

Կայքերից մեկն էլ անդրադառնալով Կապանում քաղաքապետի ընտրությունների շուրջ ծավալվող իրադարձություններին՝ այսօր գրել է. «Մեր տեղեկություններով, Աթայանին Լիսկան բավականին մեծ գումար է տվել, որպեսզի վերջինս բաժանի հօգուտ Աշոտ Հայրապետյանի, սակայն այդ գումարով պարտքերի մեջ խրված Արթուր Աթայանն իր պարտքերի մի մասն է փակել։ Մնացած մասն էլ հույս ունի փակել, երբ բարեհաջող կերպով իր ձայները կծախի Աշոտ Հայրապետյանին և կստանա խոստացված վարձատրությունը»։

Ով է Արտուր Աթայանը

52-ամյա Աթայանը 2008-2012 թթ զբաղեցրել է Կապանի քաղաքապետի պաշտոնը: Նա, ըստ լրատվամիջոցների, 2012թ,-ին դատապարտվել է պաշտոնեական դիրքը չարաշահելու համար և դատարանի որոշմամբ՝ 2 տարով զրկվել պետական պաշտոններ զբաղեցնելու իրավունքից: Լրատվամիջոցների փոխանցմամբ, Արտուր Աթայանը իրեն մեղավոր է ճանաչել առաջադրված մեղադրանքում և կլորիկ գումար տուգանք վճարելով կարողացել է խուսափել պատժից: Տեղեկություններ կան, որ Աթայանին նման մեղմ պատժի արժանանալու հարցում մեծապես օգնել է Սյունիքի մարզպետ Սուրիկ Խաչատրյանը, ում հետ Աթայանը այս պահին էլ բավականին մտերիմ հարաբերություններ ունի:
Քրեական գործի հարցուցման պահին Աթայանը զգալի հարստություն էր դիզել, այդ թվում՝ շքեղ առանձնատուն, գազալցակայան, բենզալցակայան, կրի գործարան, հյուրանոց, սրճարան, ժամանցի կենտրոն և այլն: Նույն տարիներին նա սեփականաշնորհել է արդյունաբերական և գյուղատնտեսական նշանակության մի շարք հողատարածքներ, որոնք, սակայն, գրանցված են նրա որդիների ու մտերիմների անունով:

Times.am-ի նկարահանող խումբը եղել է Կապան քաղաքում և փոքրիկ հետաքննություն է անցկացրել՝ պարզելու համար, թե քաղաքապետ աշխատած տարիներին ինչ հարստություն է դիզել Արտուր Աթայանը: Նշենք, որ այս օրերին մենք բազմիցս փորձել ենք կապ հաստատել Աթայանի հետ, սակայն ապարդյուն: Վերջինս համառորեն խուսափում է լրատվամիջոցների հարցերից: Պատճառներից մեկը միգուցե այն է, որ պաշտոնից հեռանալուց հետո՝ վերջին տարիներին Աթայանը խոշոր պարտքեր է կուտակել, որոնք մարելու համար, կապանցիների փոխանցմամբ, արդեն իսկ վաճառել է իր սեփականությունը հանդիսացած գազալցակայանը ու գործարանը, իսկ առանաձնատունը բանկային արգելանքի տակ է գտնվում: Ինքը՝ Աթայանը մասնավոր զրույցներում հայտարարում է, թե ծանր ֆիանանսաակն վիճակում է գտնվում և ստեղծված ճգնաժամից դուրս գալու միակ ելքը առաջիկա ընտրություններն են:

Այսպես. սա Արտուր Աթայանի եռահարկ առանձնատունն է, բացի սա Աթայանն ունի ևս մեկ բնակարան: Ինչպես նշեցինք, առանձնատունը բանկային արգելանքի տակ է գտնվում:

Այս լուսանկարում Աթայանի սեփականությունը հանդիսացող «Ֆենիքս» համալիրն է, որում տեղակայված է լողավազան, ֆիտնես, մերսման սրահ, 3D կինոդահլիճ, սրճարան և մանկական սրահ: Այս կենտրոնի տնօրենը Աթայանի որդին է՝ Տիգրան Աթայանը:

Հաջորդ լուսանկարներում դարձյալ Աթայանին պատկանող հյուրանոցը, ռեստորանն ու սրճարանն են, որոնց նա տիրացել է քաղաքապետ եղած տարիներին:

Իսկ ահա այս գազալցակայանն ու գործարանն, ըստ կապանցիների, Աթայանը վաճառել է՝ պարտքերը մարելու համար:

Հրապարակումն արդեն պատրաստ էր, երբ մեզ վերջապես հաջողվեց կապ հաստատել Արտուր Աթայանի հետ, նա, ինչպես միշտ, ասաց թե խորհրդակցության է և չի կարող պատասխանել հարցերին: Լսելով հարցը՝ վերջինս սկսեց բղավել ու առաջարկեց «մայլով» գրավոր հարցեր ուղարկել իրեն, սակայն, հավանաբար, փոշմանելով իր ասածից և անջատեց հեռախոսը՝ այդպես էլ չուղարկելով էլ.փոստի հացեն:

Հավելենք, որ մեր հաջորդ հրապարակումներում կներկայացնենք Կապանի քաղաքապետի մյուս թեկնածուների կենսագրության «մութ» կողմերը: