Ավստրալիայի օդանավակայաններում կհրաժարվեն անձնագրերի ստուգումից

Ավստրալիայի իշխանությունները պլանավորում են օդանավակայաններում վերացնել անձնագրերի ստուգումը եւ ներդնել օտարերկրացի ուղեւորների ինքնությունը պարզելու բարձրտեխնոլոգիական համակարգ: Այս մասին, ինչպես տեղեկացնում է «Արմենպրես»-ը, գրել է The Sydney Morning Herald թերթը:

Երկրի օդային նավահանգիստներում կտեղակայեն սարքեր, որոնք կսքանավորեն ճանապարհորդների դեմքը, աչքերը եւ/կամ մատնադրոշմները՝ այդ տեղեկատվությունը զուգադրելով տվյալների պահոցի տեղեկությունների հետ:

Ուղեւորի ինքնության պարզումը տեղի կունենա ավտոմատ կերպով եւ շատ ժամանակ չի պահանջի: Ավստրալիայի կառավարությունը ցանկանում է, որ մինչեւ 2020 թվականը նման համակարգի միջոցով ստուգվի արտասահմանից ժամանող հյուրերի մինչեւ 90 տոկոսը:

Այս տարվա հուլիսին նոր տեխնոլոգիաները կներդնեն երկրի մայրաքաղաք Կանբերայի օդանավակայանում, իսկ Սիդնեյի եւ Մելբուռնի օդային նավահանգիստներում՝ նոյեմբերին: Ծրագիրը կավարտվի 2019 թվականի մարտին:

Ավստրալիայի Ռազմավարական քաղաքականության ինստիտուտի փորձագետ Ջոն Քոյնը նշում է, որ նման համակարգը առաջինը կլինի աշխարհում: