ՄԻՊ-ն ստեղծել է աշխատանքային խումբ ԱԺ ընտրություններում ընտրական իրավունքներն ապահովելու համար
Նմանատիպ
Մարդու իրավունքների պաշտպանին վերապահված լիազորությունների շրջանակում ընտրական իրավունքների արդյունավետ պաշտպանությունը կազմակերպելու և ապահովելու համար ՄԻՊ-ը ստեղծել է աշխատանքային խումբ: «Արմենպրես»-ի հաղորդմամբ՝ փետրվարի 27-ին լրագրողների հետ հանդիպման ժամանակ նշեց ՀՀ մարդու իրավունքների պաշտպան Արման Թաթոյանը:
«Այդ աշխատանքային խմբի առջև խնդիր է դրված մշտադիտարկման սկզբունքով անընդհատ ուսումնասիրել զանազան լրատվամիջոցների հրապարակումները, ապահովել բողոքների և գանգատների պատշաճ քննարկումը ու լուծումը: Խումբը պատասխանատու է լինելու նաև քաղաքացիների ընդունելության, իրավական խորհրդատվության, արագ արձագանքման այցելությունների համար», -ընդգծեց Թաթոյանը: Նրա խոսքով՝ աշխատանքային խմբի վրա հատուկ խնդիր է դրված լինելու ուշադիր լինել՝ հատկապես դիտորդների և լրատվամիջոցների ներկայացուցիների պաշտպանությունը ապա հովելու հարցում, և, խախտում նկատելու դեպքում, անհապաղ արձագանքել:
Մարդու իրավունքների պաշտպանը տեղեկացրեց նաև, որ խումբը համագործակցում է տեղական և միջազգային կազմակերպությունների հետ: «ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) դիտորդական առաքելության ղեկավարի և պատվիրակության անդամների հետ ունեցել ենք հանդիպում: Պայմանավորվածություն ունենք համատեղ աշխատելու և մշտապես տեղեկատվության առումով կապը պահպանելու»,- նշեց Թաթոյանը:
Ընտրական ողջ գործընթացում մարդու իրավունքների պաշտպանի ողջ աշխատակազմը գործելու է բացարձակ անաչառության, հրապարակայնության, թափանցիկության և սահմանադրությամբ հիմնված մյուս սկզբունքների հիման վրա:
«Աշխատանքային խմբին հանձնարարված է աշխատել շուրջօրյա հերթապահությամբ և բոլոր հրապարակումներին արագ արձագանքել: Խմբում ներգրավված են նաև ՄԻՊ-ի աշխատակազմի մարզային ստորաբաժանումները: Այս ամենը կատարվելու է իմ անմիջական վերահսկողության ներքո: Եթե լինեն իրավունքների խախտումների վերաբերյալ ահազանգեր խումբը պատրաստ է այցելություններ կատարել սկսած ընտրատեղամասերից վերջացած ոստիկանության բաժիններ»,-շեշտեց Թաթոյանը:
Հայաստանում խորհրդարանական ընտրությունները կանցկացվեն ապրիլի 2-ին: Նախընտրական քարոզչությունը կմեկնարկի մարտի 5-ին:
Հետևեք մեզ նաև Telegram-ում