Ֆրանկոֆոնիայի օրվա կապակցությամբ Հայաստանում կանցկացվի ֆրանկոֆոն ստարտափներին եւ թվային նորարարությանը նվիրված տնտեսական հանդիպում
Նմանատիպ
Հայաստանում Ֆրանկոֆոնիայի միջազգային օրվա կապակցությամբ մարտի 15-30-ը կազմակերպվելիք տոնական միջոցառումների շրջանակում մարտի 23-ին կանցկացվի «Ֆրանկոֆոն ստարտափները եւ թվային նորարարությունը» խորագրով տնտեսական հանդիպում:
«Արմենպրես»-ի հաղորդմամբ՝ այս մասին լրագրողներին տեղեկացրեց ՀՀ-ում Ֆրանսիայի դեսպան Ժան-Ֆրանսուա Շարպանտիեն:
Հանդիպումը նպատակ ունի դիտարկել թվային տեխնոլոգիաների զարգացման մարտահրավերները, վեր հանել խնդիրները ֆրանկոֆոն տարածքում եւ ներկայացնել նորարարական լուծումներ ու ծառայություններ: Միջոցառմանը մասնակցելու են ինֆորմատիկայի ոլորտի մասնագետներ, գիտաշխատողներ, ընկերություններ, միջազգային ֆինանսական հաստատություններ եւ այլն:
15 օրվա ընթացքում անցկացվելիք միջոցառումներն անդրադառնալու են տարբեր ոլորտներին՝ կինո, գրահրատարակչություն, էկոնոմիկա եւ այլն: Այս տարվա կենտրոնական թեմա են ընտրվել նորագույն եւ թվային տեխնոլոգիաները, որին նվիրված է լինելու միջոցառումներից 5-ը՝ էլ-հարթակին նվիրված համաժողով, համացանցի բառապաշարի վերաբերյալ ֆրանսերեն լեզվի մրցույթ, սմարթֆոնների համերգ եւ այլն:
Միջոցառումների շրջանակում մարտի 20-26-ը անցկացվելու է նաեւ ֆրանկոֆոն ֆիլմերի փառատոն, որը ներառելու է բազմաժանր ֆիլմեր՝ կատակերգություններ, վավերագրական ժապավեններ եւ այլն, իսկ արդեն մարտի 21-ին Gout de France միջոցառմանը 5 մայրցամաքներից շուրջ 2000 ավագ խոհարարներ կներկայացնեն ֆրանսիական խոհանոցը:
Հետևեք մեզ նաև Telegram-ում