ՀՀ պետբյուջեի եռամսյակային եկամուտները կառավարության ծրագրի կատարումն ապահովվել են 2,7 տոկոս աճով

2017 թվականի առաջին եռամսյակում ՀՀ պետական բյուջեի եկամուտները կազմել են 270.3 մլրդ դրամ, իսկ ծախսերը` 289.5 մլրդ դրամ, որոնք համապատասխանաբար 102.7%‑ով և 87%-ով ապահովել են ՀՀ կառավարության առաջին եռամսյակի ծրագրի կատարումը:

Ինչպես տեղեկացնում է «Արմենպրես»-ը` վկայակոչելով ՀՀ ֆինանսների նախարարության հրապարակած տվյալները, ապահովվել է պետական բյուջեի ծախսային ծրագրերի շրջանակներում պետական մարմինների կողմից սահմանված կարգով ստանձնած պարտավորությունների ամբողջական և ժամանակին կատարումը:

Ելնելով օրենսդրության պահանջներից՝ պետության դրամական միջոցների համախմբված հաշվառման նպատակով պետական բյուջեի ծրագրային և փաստացի ցուցանիշներում ներառվել են նաև ՀՀ պետական հիմնարկների համար բացված արտաբյուջետային հաշիվների համապատասխան շրջանառությունը, ինչպես նաև առանց սահմանափակման պետական բյուջեից կատարվող վճարումները: Մասնավորապես, արտաբյուջետային եկամուտները և ծախսերը կազմել են 6.1-ական մլրդ դրամ՝ ապահովելով առաջին եռամսյակի ծրագրային ցուցանիշների համապատասխանաբար` 9%‑ը և 65%-ը: Պետական բյուջեի տարեկան ծրագրային ցուցանիշները կատարվել են եկամուտների գծով` 22%-ով, ծախսերի գծով` 20.9%-ով: