ՀՆԱ 7.5 տոկոսանոց աճը միջազգային շուկայի տեղաշարժերի, դրական սպասումների արդյունք է. բյուջեի կատարողականը ՈՒՂԻՂ

ԵՐԵՎԱՆ, 29 ՄԱՅԻՍԻ, Times.am: Նախորդ տարի Հայաստանում գրանցված տնտեսության 7.5 տոկոսանոց աճը պայմանավորվել է ինչպես միջազգային շուկայում արձանագրված տեղաշարժերով, այնպես էլ ներքին շուկայի առանձնահատկություններով: Ազգային ժողովում հանձնաժողովների համատեղ նիստում 2017 թվականի բյուջեի կատարողականը ներկայացրեց ՀՀ ֆինանսների նախարար Ատոմ Ջանջուղազյանը: «Աճը պայմանավորվել է գործընկեր երկրներում, մասնավորապես, Ռուսաստանի Դաշնությունում տնտեսական աճի կանխատեսվածից ավելի բարձր լինելու հանգամանքով, միջազգային շուկայում մետաղների գների աճով, ՌԴ-ից դեպի Հայաստան դրամական փոխանցումների ավելացմամբ, սուբյեկտների մոտ ձևավորված դրական սպասումներով, ինչպես նաև արձանագրված վարկավորման աճով»,-ասաց Ատոմ Ջանջուղազյանը:

Նրա խոսքով՝ տնտեսական աճին 5.1 տոկոսով նպաստել են ծառայությունների ոլորտի աճը, 1.8 տոկոսով արդյունաբերությունը, 0.2 տոկոսային կետով շինարարությունը, 0.6 տոկոսային կետով աճի վրա բացասական ազդեցություն է ունեցել գյուղատնտեսության ոլորտը:

Անդրադառնալով պլանավորված և փաստացի եկամտային, ծախսային և դեֆիցիտի ցուցանիշներին՝ նա նշեց, որ եկամուտների համար պլանավորվել է 1 տրիլիոն 210 միլիարդ դրամ, ճշտված պլանով՝ 1 տրիլիոն 320 միլիարդ, փաստացի ապահովվել է 1 տրիլիոն 237 միլիարդ դրամ: Ծախսերը պլանավորվել են 1 տրիլիոն 360 միլիարդ դրամ, ճշտված պլանով՝ 1 տրիլիոն 561 միլիարդ դրամ, փաստացի այն կազմել է 1 տրիլիոն 504 միլիարդ դրամ: Դեֆիցիտը պլանավորվել է 150 միլիարդ դրամ, ճշտված պլանով՝ 240 միլիարդ դրամ, փաստացի դեֆիցիտը կազմել է 267 միլիարդ դրամ: