Բյուջեն պետք է հիմնված լինի օրվա իրողությունների վրա հենված կանխատեսումների վրա. ՀՀ վարչապետ
Նմանատիպ
ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության վարչապետ Նիկոլ Փաշինյանը ՀՀ 2019թ. պետական բյուջեի այս պահին առկա նախագիծը համարում է իներցիոն, որովհետև նախագիծը ձևավորել են նախկինից եկած իներցիայի տրամաբանության շրջանակներում: «Ֆեյսբուք»-ի ուղիղ եթերում ՀՀ վարչապետն ընդգծեց, որ ընդունված է, որ բյուջեն հիմնված լինի ոչ թե կանխատեսումների, այլ ավելի շատ օրվա իրողությունների վրա հենված կանխատեսումների վրա:
«Եվ, ըստ էության, բյուջեի այս պահին առկա նախագիծը և նույնիսկ վաղը ընդունված նախագիծը որևէ խոչընդոտ չէ, որ մենք ընթացս աշխատենք բյուջեի պարամետրերի բարելավման վրա, այդ թվում՝ մեզ հուզող բազմաթիվ խնդիրների լուծման տրամաբանության առումով, բյուջետային հիմնարկների աշխատողների աշխատավարձերի բարձրացման առումով և այլն»,- «Արմենպրես»-ի փոխանցմամբ՝ նշեց նա:
Վարչապետը հավելեց, որ բյուջեի նախագծի վերաբերյալ պաշտոնական քննարկումներն առաջիկայում կսկսվեն: «Մենք բյուջեի վերաբերյալ բազմաթիվ քննարկումներ և պարզաբանումներ կունենանք»,– ընդգծեց Նիկոլ Փաշինյանը:
Նա ընդգծեց, որ պետք է քայլ առ քայլ բարեփոխումներ իրականացնելու միջոցով առաջ շարժվեն, որը ունենալու է երկու հիմնական նպատակ: «Առաջինը Հայաստանն արդյունաբերական երկիր դարձնելն է, երկրորդը՝ պետական կառավարման համակարգի արդյունավետության բարձրացումն է, որովհետև առանց պետական կառավարման արդյունավետությունը բարձրացնելու Հայաստանի վերաինդուստրիալիզացիայի խնդիրը շատ դժվար կլինի լուծել, և մենք այստեղ քայլ առ քայլ ու վստահորեն առաջ պետք է գնանք»,- եզրափակեց վարչապետ Փաշինյանը:
Հետևեք մեզ նաև Telegram-ում