Նավթի գները կտրուկ աճել են Թրամփի՝ Իրանին հասցեագրված սպառնալիքներից հետո

Համաշխարհային շուկաներում նավթի գները զգալի աճ են գրանցել այն բանից հետո, երբ ԱՄՆ նախագահ Դոնալդ Թրամփը հայտարարել է, որ Իրանի դեմ կարող են կիրառվել «շատ հզոր հարվածներ»։

Տարածված մտահոգությունների ֆոնին ներդրողները գնահատում են Մերձավոր Արևելքում լարվածության հետագա սրման և էներգակիրների մատակարարման հնարավոր խափանումների ռիսկերը, ինչը նպաստել է նավթի գների աճին։

Ըստ Reuters-ի՝ Brent տեսակի նավթի ֆյուչերսների գինը աճել է 2,63 դոլարով կամ 2,8%-ով՝ հասնելով մեկ բարելի դիմաց 94,06 դոլարի։ Միաժամանակ, ամերիկյան WTI տեսակի նավթը թանկացել է 2,93 դոլարով կամ 3,3%-ով՝ հասնելով 91,12 դոլարի մեկ բարելի դիմաց։ Օրվա ընթացքում WTI-ի գինը նույնիսկ բարձրացել է մինչև 91,47 դոլար՝ սահմանելով ներօրյա առավելագույն ցուցանիշ։

Շուկայի մասնակիցների գնահատմամբ՝ տարածաշրջանային հակամարտության խորացման հավանականությունը շարունակում է մնալ նավթի գների հիմնական շարժիչ գործոններից մեկը, իսկ Իրանի շուրջ զարգացումները կարող են առաջիկայում շարունակել ազդեցություն ունենալ միջազգային էներգետիկ շուկաների վրա։

Հետևեք մեզ նաև Telegram-ում