Իրանի և ԱՄՆ-ի միջև փոխըմբռնման հուշագիրը Վաշինգտոնի պարտության փաստաթուղթն է. Մոհամմադ Ղալիբաֆ

Իրանի խորհրդարանի նախագահ Մոհամմադ Բաղեր Ղալիբաֆը իրանական լրատվամիջոցին տված հարցազրույցում Իրանի և ԱՄՆ-ի միջև փոխըմբռնման հուշագիրն անվանել է փաստաթուղթ, որը վկայում է Վաշինգտոնի պարտության մասին, հաղորդում է Pars Today-ը։

«Այս հուշագիրը ԱՄՆ-ի պարտությունը հավաստող փաստաթուղթ է։ Ժողովուրդը կտեսնի և կկայացնի իր դատավճիռը»,- հայտարարել է Ղալիբաֆը։

Նա նշել է, որ փաստաթղթի մի շարք դրույթների շուրջ աշխատանքը եղել է բարդ և տևական՝ իրավական նրբությունների պատճառով։

«Հուշագրի որոշ կետեր քննարկվել են ժամերով՝ դրանց իրավական նրբության պատճառով»,- ասել է խորհրդարանի խոսնակը։

Ինչպես հաղորդում է Fars-ը, Ղալիբաֆը ուշադրություն է հրավիրել նաև համաձայնագրի՝ երկրի տնտեսական վերականգնմանը վերաբերող դրույթներին։ Նա հավելել է, որ հուշագրի վեցերորդ կետով նախատեսված է Իրանի վերականգնման և տնտեսական զարգացման ծրագիր, որին նախատեսվում է ուղղել 300 միլիարդ դոլարի ներդրումներ։

«Այս կետում սահմանված է 300 միլիարդ դոլարի գումար՝ Իրանում ներդրումների համար, որոնց մի մասն ուղղվելու է վերականգնմանը»,- նշել է նա։

Խորհրդարանի ղեկավարն անդրադարձել է նաև Իրանի դեմ սահմանափակող միջոցների հարցին և հայտարարել, որ ծովային շրջափակման երկարատև պահպանման վերաբերյալ մտահոգությունները չեն արդարացել։

«Ոմանք անհանգստանում էին՝ արդյո՞ք շրջափակումը կհանվի միայն 30 օր հետո։ Բայց, փառք Աստծո, այն չեղարկվեց ընդամենը երեք օրում»,- ասել է Ղալիբաֆը։

Բացի դրանից, նա քննադատել է միջազգային կառույցների արձագանքը վերջին հակամարտությանը՝ նշելով, որ Միավորված ազգերի կազմակերպությունը չի տարածել որևէ հայտարարություն, որում ԱՄՆ-ն ագրեսոր կորակվեր։

«ՄԱԿ-ը նույնիսկ մեկ հայտարարություն չի հրապարակել, որով ԱՄՆ-ն ագրեսոր կճանաչվեր։ Մի աշխարհում, որտեղ գործում է ուժի օրենքը, մենք պետք է պաշտպանենք մեր շահերը սեփական հզորությամբ»,- հայտարարել է Իրանի խորհրդարանի նախագահը։

Հետևեք մեզ նաև Telegram-ում