Իրանը դարձել է տարաձայնությունների պատճառ Թրամփի և Նեթանյահուի միջև․ WSJ

ԱՄՆ նախագահ Դոնալդ Թրամփի և Իսրայելի վարչապետ Բենիամին Նեթանյահուի հարաբերություններն աստիճանաբար լարվում են՝ Իրանի հարցում ունեցած տարբեր մոտեցումների պատճառով, գրում է The Wall Street Journal-ը։

Պարբերականի տեղեկություններով՝ Թրամփը կողմ է Իրանի հետ դիվանագիտական գործընթացի շարունակմանը, մինչդեռ Նեթանյահուն հանդես է գալիս ռազմական ճնշման պահպանման օգտին։

Աղբյուրների փոխանցմամբ՝ Թրամփը Նեթանյահուին ասել է. «Ինչո՞ւ եք պայթեցնում շենքերը… Դադարեցրեք շենքերը պայթեցնելը»։ Իսկ մասնավոր զրույցներում, ըստ հաղորդման, նա դժգոհել է, որ Նեթանյահուն «ուզում է ռմբակոծել բոլորին անխտիր»։

WSJ-ի տվյալներով՝ Նեթանյահուն բազմիցս կասկածի տակ է դրել Իրանի հետ Թրամփի բանակցությունների ընթացքը՝ հարցնելով. «Դոնալդ, ինչպե՞ս ես պատրաստվում դա ստուգել»՝ ակնարկելով հնարավոր համաձայնագրի միջուկային դրույթների վերահսկման մեխանիզմները։

Հաղորդվում է նաև, որ այժմ Թրամփը հեռախոսազրույցներից հետո հաճախ իր վարչակազմի անդամներից հետաքրքրվում է, թե որքանով են Նեթանյահուի հայտարարությունները համապատասխանում իրականությանը։ Բարձրաստիճան պաշտոնյաներից մեկի խոսքով՝ նախկինում նա նման հարցադրումներ չէր անում։

Հետևեք մեզ նաև Telegram-ում