Սթարմերի փորձը ցույց է տալիս՝ վարչապետի պաշտոնը դժվար է համատեղել «սովորական մարդու» կերպարի հետ. The Observer

The Observer-ը գրում է, որ Մեծ Բրիտանիայի վարչապետ Քիր Սթարմերի փորձը կարող է զգուշացում լինել Էնդի Բերնհեմի համար, որի հանրային գրավչության մի մասը հիմնված է «սովորական մարդու» կերպարի վրա։

Հոդվածում նշվում է, որ վարչապետի պաշտոնը ինքնին արտասովոր է և դժվար է այն զբաղեցնելուց հետո շարունակել ընկալվել որպես «սովորական» մարդ։

Պարբերականը հիշեցնում է, որ Սթարմերն իր քաղաքական կերպարը կառուցում էր հասարակ ընտանիքից սերելու, «գործիքագործի որդի» լինելու և սովորական միջավայրից առաջ գալու պատմության վրա։ Սակայն վարչապետ դառնալուց հետո այդ կերպարը բախվել է նոր իրականության՝ պաշտոնական հագուկապի, անվտանգության խիստ միջոցների և հանրային մշտական վերահսկողության հետ։

The Observer-ը նաև նշում է, որ վարչապետի պաշտոնը մարդուն առանձնացնում է հասարակ կյանքից․ վարչապետներին ողջ կյանքի ընթացքում ուղեկցում է զինված անվտանգությունը, ինչի հետևանքով նույնիսկ ֆուտբոլային խաղերին սովորական երկրպագուների հետ ներկա լինելը դառնում է դժվար։

Հոդվածում հիշատակվում է նաև Սթարմերի տան դեմ իրականացված հրկիզման դեպքը և դրանից հետո սոցիալական ցանցերում տարածված կեղծ տեղեկությունները, որոնք, ըստ հրապարակման, կապվում էին Կրեմլին առնչվող շրջանակների և ռուսական մեդիայի տարածած քարոզչության հետ։

The Observer-ի գնահատմամբ՝ Սթարմերի օրինակը ցույց է տալիս, որ վարչապետի պաշտոնը փոխում է ոչ միայն մարդու առօրյան, այլև հանրային ընկալումը՝ դժվարացնելով «սովորականության» քաղաքական կերպարի պահպանումը։

Հետևեք մեզ նաև Telegram-ում