Մեկնարկեց Հայաստանի Կոմունիստական կուսակցության 39-րդ համագումարը, որին մասնակցում է 378 պատգամավոր: Ինչպես հայտնում է «Արմենպրես»-ը, նախ հնչեց Կոմունիստական կուսակցության հիմնը, որի ժամանակ նիստի դահլիճ բերվեց կուսակցության դրոշը:
ՀԿԿ կենտկոմի առաջին քարտուղար Տաճատ Սարգսյանը նախագահություն հրավիրեց ՀԿԿ տարբեր շրջկոմների առաջին քարտուղարներին, այդ թվում` Լեռնային Ղարաբաղի ներկայացուցիչներին: Նա նաև հայտնեց, որ համագումարին որպես հյուր մասնակցում են Ռուսաստանի, Վրաստանի Կոմունիստական կուսակցությունների անդամներ:
Այնուհետև դահլիճ բերվեց ծաղկեպսակ, որը պետք է զետեղվի Հայաստանում խորհրդային կարգերի հաստատման համար իրենց կյանքը զոհած մարտիկների հուշարձանին: Կոմունիստները մեկ րոպե լռությամբ հարգեցին իրենց այն կուսակից ընկերների հիշատակը, ովքեր հեռացել են կյանքից:
Տաճատ Սարգսյանը դահլիճ հրավիրեց, իր խոսքով, հանրապետության մի շարք դպրոցների մեկ տասնյակին մոտ պիոներների, ովքեր հայտնեցին, որ միշտ պատրաստ են ծառայել կուսակցությանը:
