Թրամփը պատրաստ է բանակցությունների Իրանի հետ՝ հրադադարի պայմանով․ NYP

ԱՄՆ նախագահ Դոնալդ Թրամփը պատրաստ է հնարավորություն տալ Իրանի հետ խաղաղ բանակցություններին, եթե Թեհրանը համաձայնի հրադադարի, գրում է The New York Post-ը՝ հղում անելով ամերիկացի բարձրաստիճան պաշտոնյայի։

«Սա ցանկացած բանակցության հիմքն է․ դրանք սկսվում են հրադադարից, և հրադադարը պետք է սկսվի Իրանից», – պարբերականին ասել է անանուն պաշտոնյան։

Նրա խոսքով՝ Իրանի նախագահ Մասուդ Փեզեշքիանը և երկրի արտգործնախարար Աբբաս Արաղչին բաց են հակամարտության դիվանագիտական կարգավորման համար, սակայն Իրանի Իսլամական հեղափոխության պահապանների կորպուսը (ԻՀՊԿ), նրա պնդմամբ, «դուրս է եկել վերահսկողությունից» և շարունակում է հարվածներ հասցնել։

Ամերիկացի պաշտոնյան նաև նշել է, որ Իրանի ղեկավարությունը պետք է վերահսկողություն հաստատի իրավիճակի նկատմամբ։

«Նախագահ Թրամփը հստակ հասկացնել է տվել, որ ցանկանում է հնարավորինս արագ հասնել համաձայնության։ Սակայն եթե Իրանը շարունակի հարձակումներ գործել նավերի, ԱՄՆ ռազմաբազաների և Պարսից ծոցի տարածաշրջանում Վաշինգտոնի դաշնակիցների դեմ, դրա համար ստիպված կլինի վճարել», – ընդգծել է նա։

Հետևեք մեզ նաև Telegram-ում