Բախումներ Հորմուզում, նավթատարի հրդեհ և սպառնալիք Թրամփի որդուն. Իրանն ու Օմանը փորձում են բացել «կյանքի ջրանցքը»

Թեհրանն ու Մասկատը վերսկսել են ետնաբեմային բանակցությունները՝ փորձելով վերահսկողություն սահմանել աշխարհի ամենառազմավարական ջրային ուղիներից մեկի՝ Հորմուզի նեղուցի նկատմամբ: Համաշխարհային նավթի ու հեղուկացված գազի փոխադրումների մեկ հինգերորդն ապահովող այս միջանցքը փաստացի կաթվածահար է եղել, ինչն ստիպել է կողմերին քննարկել համատեղ ականազերծման և «ժամանակավոր նավագնացային միջանցք» բացելու հարցը: Չնայած Վաշինգտոնից հնչող հայտարարություններին, թե ջրային տարածքն արդեն մաքրված է, իրավիճակը տեղում շարունակում է մնալ պայթյունավտանգ. վերջին ժամերին Օմանի ափերի մոտ անհայտ հարվածից վնասվել է հերթական նավթատար նավը:

Ճգնաժամը խորանում է նաև տեղեկատվական ու քաղաքական ճակատում: Իրանական պետական հեռուստատեսությունը ցուցադրել է տեսանյութ, որտեղ քննարկվում է Դոնալդ Թրամփի կրտսեր որդու՝ 20-ամյա Բարոն Թրամփի դեմ հնարավոր մահափորձի սցենարը՝ նշելով նրա գլխագնի համար 10 միլիոն դոլարի մասին: Սրան արդեն արձագանքել է ԱՄՆ Գաղտնի ծառայությունը: Զուգահեռաբար, Սպիտակ տան տնտեսական ճնշումներին ու պատժամիջոցների սպառնալիքներին Թեհրանը պատասխանել է կոշտ հայտարարությամբ՝ ԱՄՆ քաղաքականությունը որակելով ապօրինություն: Ուշագրավ է, որ չնայած այս ամենին, Վաշինգտոնն աստիճանաբար վերականգնում է դիվանագիտական անձնակազմի ներկայությունը Մերձավոր Արևելքում, մինչդեռ ԱՄՆ-ում անցկացված հարցումները ցույց են տալիս, որ պատերազմի նկատմամբ ամերիկյան հանրության աջակցությունն ռեկորդային ցածր մակարդակի վրա է:

Հետևեք մեզ նաև Telegram-ում