Պատմական քաղաքական փոփոխություն Սերբիայում․ Ալեքսանդր Վուչիչը ընդունել է պարտությունը ընտրություններում

Սերբիայի իշխող «Սերբական առաջադիմական կուսակցության» (ՍԱԿ) առաջնորդ Ալեքսանդր Վուչիչը պաշտոնապես ընդունել է պարտությունը արտահերթ խորհրդարանական ընտրություններում՝ հայտարարելով, որ ընդդիմադիր «Ուսանողական ցուցակը» կստանա կառավարություն ձևավորելու համար անհրաժեշտ մեծամասնությունը: Հայտարարությունը արվել է նախնական հաշվարկների փուլում․ Վուչիչի փոխանցմամբ՝ «Ուսանողական ցուցակը» կստանա 135-ից 140 պատգամավորական մանդատ, մինչդեռ իշխող ուժին բաժին է ընկնում մոտ 105 մանդատ:

Ընտրություններում արձանագրվել է աննախադեպ բարձր մասնակցություն՝ մոտ 68%, ինչն էլ վճռորոշ է դարձել վերջնական արդյունքների համար։ Իշխող կուսակցությանը հաջողվել է հավաքել 1 միլիոն 720 հազար քվե, սակայն դա բավարար չի եղել հաղթանակի համար։ Վուչիչի գնահատմամբ՝ խորհրդարան կարող են անցնել միայն մի քանի ազգային փոքրամասնությունների ներկայացուցիչներ, այդ թվում՝ վոյեվոդինյան հունգարացիները, ալբանացիները և Դեմոկրատական գործողության կուսակցությունը (SDA):

Արտահերթ ընտրությունները նշանակվել էին սեպտեմբերին ծավալված քաղաքական ճգնաժամի ֆոնին, երբ Վուչիչը լուծարեց խորհրդարանն ու հեռացավ նախագահի պաշտոնից՝ նպատակ ունենալով հաղթանակից հետո գլխավորել կառավարությունը: Սակայն 2024 թվականից սկիզբ առած բողոքի ալիքի հիման վրա ձևավորված «Ստուդենտները հաղթում են» շարժումը լուրջ մրցակցություն ձևավորեց՝ վերջ դնելով իշխող կուսակցության բազմամյա մենաշնորհին։ Քվեարկության օրը լարված մթնոլորտ է տիրել երկրում, իսկ Բելգրադում ոստիկանությունը փակել է Կենտրոնական ընտրական հանձնաժողովի շենքի հարակից փողոցները:

Հետևեք մեզ նաև Telegram-ում