Հայաստանի վաստակավոր «Բերդ» անսամբլը հայկական ժողովրդական մշակույթը ներկայացնում է Եվրոպայում

Հուլիսի 19-ից Հայաստանի վաստակավոր կոլեկտիվ «Բերդ» անսամբլը՝ ՀՀ արվեստի վաստակավոր գործիչ Կարեն Գեւորգյանի ղեկավարությամբ, մեկնել է Եվրոպա՝ մասնակցելու Ֆրանսիայում, Իսպանիայում եւ Բելգիայում անցկացվող ժողովրդական պարերի փառատոնների: «Բերդը» 35 օր շարունակ 25 մենահամերգով հանդես է գալիս Ֆրանսիայի եւ Իսանիայի մի շարք քաղաքներում:

Կարեն Գեւորգյանի խոսքով՝ համույթի ելույթներին ներկա են գտնվում օտարերկրացի հազարավոր հանդիսատեսներ. ««Բերդի» ելույթներին արձագանքել են ֆրանսիական մի շարք լրատվամիջոցներ: Նրանք բարձր են գնահատել հայկական մշակույթը՝ շեշտելով, որ «մի քանի տասնյակ հոգով պարի լեզվով պատմում են Շառլ Ազնավուրի երկրի պատմությունը»: Համերգներն անցնում են հոտնկայս ծափահարություններով, կարելի է ասել՝ հանդիսատեսը թույլ չի տալիս, որ արտիստները բեմից հեռանան: Մրցանակային տեղեր չկան, յուրաքանչյուր երկիր ներկայացնում է իր մշակույթը»,- նշում է Կարեն Գեւորգյանը:

«Բերդ» անսամբլը, ՀՀ մշակույթի նախարարության աջակցությամբ, Եվրոպայում կլինի մինչեւ օգոստոսի 27-ը: