«Զվարթնոց» օդանավակայանում շուրջ 140 ուղևոր բողոքի ակցիա է կազմակերպել: Պատճառն այն է, որ դեպի Շարմ Էլ Շեյխ չվերթն արդեն մի քանի օր շարունակ հետաձգվում է՝ առանց հիմնավոր պատճառաբանություններ ներկայացնելու:
«Սփոթ Էյր» ավիաընկերությունը, որը պետք է ծրագրված չվերթ իրականացներ օգոստոսի 7-ի գիշերը, ժամը 03:30-ին, հրաժարվել է ուղևորներ տեղափոխել Հայաստանից, իսկ «Հեփի վոյաժ» ընկերությունը, որը տոմսեր է վաճառել 140 ուղևորի, չվերթի հետաձգման որևէ հստակ պատճառաբանություն չի ներկայացնում:
Ինչպես հայտնում է Panorama.am-ը, բողոքի ակցիայի մասնակիցները նշում են, որ տեղեկություն կա, թե այդ ընկերությունը պարզապես չի վճարել «Սփոթ Էյր» արաբական ավիաընկերությանը, այդ պատճառով էլ նրանք հրաժարվում են գալ Հայաստան և չվերթ իրականացնել:
Այս պահի դրությամբ՝ ընկերությունը խոստացել է չվերթ իրականացնել ժամը 20:00-ին: Եթե այս անգամ էլ չիրականանա, ուղևորները պատրաստվում են հետ պահանջել իրենց գումարները:
