«Հրապարակը» գրում է, որ քաղաքացիական պատերազմի հետեւանքով Սիրիայից Հայաստան ներգաղթած մեր հայրենակիցներից, ովքեր մշտական կապի մեջ են դեռեւս Հալեպում բնակվող իրենց հարազատների հետ, երեկ տեղեկացանք, թե այս օրերին ինչ է կատարվում հատկապես հայաբնակ շրջաններում:
Սեպտեմբերի 20-ի լույս 21-ի գիշերը սիրիական ընդդիմությունը կրկին ռմբակոծել է հայաշատ եւ առհասարակ քրիստոնեաբնակ շրջանները՝ դրանք գրավելու նպատակով, եւ ռազմական գործողությունների հետեւանքով սպանվել է մեկ հայ:
Մեր հայրենակիցները նշում են, որ Հալեպում մնացած հայերին այլ տարբերակ չի մնում, քան շուտափույթ պատերազմական քաղաքից հեռանալը: Իսկ Հալեպում, նախքան պատերազմական գործողությունները, մոտ 35 հազար հայ էր բնակվում, եւ նրանցից ընդամենը 7-8 հազարն է հասցրել դուրս գալ այս ամիսների ընթացքում: Այդ 7-8 հազարից հազիվ 2,5, առավելագույնը՝ 3 հազարն է Հայաստան ներգաղթել, մյուսներն ապաստան են գտել Լիբանանում եւ այլ երկրներում:
