Ռուսաստանի գիտությունների ակադեմիայի արևելագիտության ինստիտուտի տնօրեն Վիտալի Նաումկինը «Голос России» ռադիոկայանի հետ զրույցում անդրադարձել է ՀՀ նախագահ Սերժ Սարգսյանի` Ռուսաստանի Դաշնություն կատարած այցին, մասնավորապես ասել է, որ Հայաստանը հետխորհրդային տարածքում Ռուսաստանի ամենամոտ պետություններից է: Ըստ աղբյուրի, քաղաքագետն ավելացրել է, որ մեծ հաշվով, հայ-ռուսական երկկողմ հարաբերություններում որևէ խնդիր չկա: Միեւնույն ժամանակ նա ընդգծել է, որ գոյություն ունեն մի շարք խնդիրներ` կապված տարածաշրջանում առկա իրավիճակի հետ:
Նաումկինն ընդգծել է, որ այցն ընթացել է աշխատանքային մթնոլորտում, քանի որ Հայաստանի և Ռուսաստանի միջև հարաբերությունները ռազմավարական են, գործընկերային:
«Հայաստանը հետխորհրդային տարածքում Ռուսաստանի ամենամոտ պետություններից մեկն է, և մեծ հաշվով, մեր երկկողմ հարաբերություններում որևէ խնդիր չկա, սակայն կան մի շարք խնդիրներ’ կապված տարածաշրջանում առկա իրավիճակի հետ, հատկապես Ղարաբաղյան հակամարտության շուրջ», նշել է նա` ընդգծելով, որ ԼՂ հակամարտությունը շարունակում է մնալ չլուծված:
«Ինչպես հայտնի է, վերջին տարիներին հակամարտության կարգավորման բոլոր աշխատանքներն իրականացվում են մեկ ուղղությամբ’ ՌԴ-ի միջնորդությամբ Հայաստանի և Ադրբեջանի նախագահների հանդիպումների: Եվ այդ երկարաժամկետ խնդիրն անպայման ընկած է լինում ցանկացած հանդիպման հիմքում: Դժվար է ասել’ կարելի է արդյոք սպասել բեկումներ այդ հարաբերություններում: Բայց, ամեն դեպքում, դրանք երկկողմ ձևաչափով չեն որոշվում»,- ամփոփել է ռուս քաղաքագետը:
