ՀՀ փոխվարչապետ, հայ-քաթարական միջկառավարական համատեղ հանձնաժողովի համանախագահ Արմեն Գևորգյանն այսօր Դոհայում հանդիպումներ է ունեցել քաթարական խոշոր «Hassad Food » և «Mawashi» ընկերությունների ներկայացուցիչների հետ:
Ընկերությունները լայն գործունեություն են ծավալում գյուղտնտեսության և անասնաբուծության ոլորտում’ ապահովելով ինչպես տեղական, այնպես էլ տարածաշրջանի մյուս երկրների շուկաների գյուղմթերքի պահանջարկը:
ՀՀ Տարածքային կառավարման նախարարության հասարակայնության հետ կապերի բաժնի տեղեկացմամբ’ ընկերության ներկայացուցիչները նշել են, որ հետաքրքրված են Հայաստանի հետ համագործակցությամբ: Նրանք տեղեկություններ են ներկայացրել ընկերությունների գործունեության ուղղությունների, ծավալների, աշխարհագրության, ապագա ծրագրերի մասին’ հեռանկարային համարելով նաև Հայաստանի հետ փոխգործակցությունը:
Փոխվարչապետը տեղեկացրել է, որ Հայաստանում գյուղատնտեսության ոլորտի զարգացումը ՀՀ կառավարության համար կարևոր գերակայություն է, ապա ներկայացրել է ոլորտի զարգացմանն ուղղված ծրագրերը, որոնց իրականացումն առաջիկա տարիներին շարունակվելու է:
Փոխվարչապետը ողջունել է Հայաստանի հետ համագործակցելու ընկերությունների մտադրությունը և կառավարության անունից աջակցության պատրաստակամություն հայտնել փոխշահավետ ծրագրերի իրականացման հարցում: Նա մասնավորապես նշել է, որ հանրապետությունում առկա են գյուղմթերքի, կենդանի անասունների, թարմ մրգի և բանջարեղենի, խմելու ջրի, վերամշակող ձեռնարկությունների արտադրանքի’ պահածոների, հյութերի, արտահանման հնարավորություններ:
Ա. Գևորգյանն ընկերությունների ներկայացուցիչներին առաջարկել է այցելել Հայաստան’ փոխգործակցության հնարավորություններին տեղում ծանոթանալու, հնարավոր ուղղությունները հստակեցնելու համար:
