Իսպանիայի առաջնության 31-րդ տուրում «Վալենսիան» «Մեստալիա» մարզադաշտում ընդունել է «Էսպանյոլին»: «Չղջիկները» հաղթել են 1:0 հաշվով:
Միակ գոլը 7-րդ րոպեին խփել է Ռոդրիգո Մորենոն, ով գլխի հարվածով եզրափակել է Գոնսալու Գեդեշի փոխանցումը: Հանդիպման ընթացքում երկու թիմերի ֆուտբոլիստներն աչքի ընկնելու այլ լավ պահեր են ունեցել, սակայն նոր գոլեր չեն արձանագրվել:
Մարսելինո Գարսիա Տորալի թիմը Լա լիգայի վերջին 9 տուրերում 8 հաղթանակ է տոնել (1 ոչ-ոքի): Անընդմեջ հաղթանակների շարքը կազմում է 5 հանդիպում:
«Էսպանյոլի» դեմ խաղից հետո «Վալենսիան» վաստակել է 65 միավոր, շրջանցել Մադրիդի «Ռեալին» ու բարձրացել երրորդ հորիզոնական: «Սերուցքայինները», որոնք երեկ «Ատլետիկոյի» (68) հետ ոչ-ոքի են խաղացել, չորրորդ տեղում են: «Էսպանյոլը» 36 միավորով 14-րդն է:
Հաջորդ տուրում «Վալենսիան» հյուրընկալվելու է առաջատար «Բարսելոնային» (79):
