Լևոն Ալթունյանը պատրաստակամ է շարունակել աշխատանքը առողջապահության նախարարի պաշտոնում
Նմանատիպ
Հայաստանի առողջապահության նախարար Լևոն Ալթունյանը պատրաստակամ է շարունակել պաշտոնավարումը նաև նոր կառավարության կազմում: Մարզահամերգային համալիրում լրագրողների հետ զրույցում նա նշեց, որ ցանկություն ունի պորտֆելը պահպանելու և առողջապահության ոլորտում բարեփոխումները շարունակելու:
«Արմենպրես»-ի փոխանցմամբ` նախարարն ընդգծեց, որ ոլորտի գերակա խնդիրները կան, ծրագրերը կան, և, ընդհանրապես, տարբերություն չկա, թե ով կյանքի կկոչի այդ գերակա ծրագրերը: Հարցին, թե ցանկություն ունի՞ պահպանել պորտֆելը և կյանքի կոչել գերակա ծրագրերը, նախարարը պատասխանեց. «Այո, ես կարծում եմ, որ այդ ուժն ունեմ»:
Լևոն Ալթունյանը չպատասխանեց հարցին, թե պաշտոնավարման ընթացքում ի՞ նչ օգտակար քայլ է արել համակարգի համար: Դիտարկմանը, թե ինքն ամենաշատ քննադատվող նախարարն է, Ալթունյանը պատասխանեց. «Հարցրեք քննադատողներին»:
Իսկ հարցին, թե ի՞նչ դրական արդյունքներ է արձանագրել պաշտոնավարման ընթացքում, նախարարը պատասխանեց, որ դրական արդյունքները պետք է գնահատեն ղեկավարները և ժողովուրդը:
Հետևեք մեզ նաև Telegram-ում