«Հայաստանում շարժվում ենք գողական արժեքներով, դրա համար էլ այսօր հայտնվում ենք ցավալի կացության առաջ: Սյունիքի պարագան բացառություն չէ, բայց երբ մի քանի օր առաջ նույն կառույցի ուսանող սպան գնդակահարեց իր մյուս ընկերոջը, նրանք էլ հո պաշտոնյա չէին: Երբ մարդիկ իրար են դանակահարում արդյոք սա՞ էլ պաշտոնյայի խնդիրն է: Հասարակության ներսում գոյություն ունեցող բացասական մենթալիտետի հարցն է: Հայ ժողովուրդը արարող է, ոչ թե մարդասպան:Մենք կորցրել ենք մեր բարոյական կերպարը»,- օրեր առաջ Գորիսում Սյունիքի մարզպետի տան դիմաց տեղի ունեցած դեպքը առանց մասնավորեցնելու ու մեկնաբանելու ասաց Հայր Կոմիտաս վարդապետ Հովնանյանը: Այս մասին հայտնում է Aravot.am-ը:
Նրա խոսքերով, «Մենք անկախությունը սխալ հասկացանք: Անկախությունը նշանակում է, որ ազգը ձեւավորվում է այնպիսի իրավիճակում, որտեղ հարգանքն է գերիշխողը: Մենք, որ հազար տարի պետականություն չենք ունեցել եւ այսօր ունենք, ոչ թե իրար դեմ թշնամանքով լցվելով պետք է իմաստավորենք մեր պետական կառույցը, այլ իրար օգնելով ու սիրելով: Կարիք չունենք նախկին սովետ միության տրամադրության շարունակականության կրողը լինել… ամեն մեկ անձ անկախ պետության մեջ պետք է արժեւորվի, ոչ թե ոմանք իրենց գերարժեւորեն եւ այլոց թերագնահատեն»:
Հայր Կոմիտասը օրինապահության խնդիր է տեսնում, երբ արյունալի ավարտ ունեցող իրադարձության հետ կապված մարզպետը ոչ թե ազատվում է պաշտոնից, այլ ժամանակավորապես դադարեցնում է լիազորությունները (զրույցը տեղի էր ունեցել մինչ այն պահը, երբ կառավարությունը հաստատեց Սուրիկ Խաչատրյանի հրաժարականի դիմումը.- Ա. Ս.) .«Կան երկրներ, որտեղ օրենքը արժեք ունի: Իսկ ուր օրինապահություն չկա, այնտեղ ամենաթողությունը պետք է իշխող լինի:
Մարզպետի պարագայի վրա չպետք է կենտրոնանանք, ինչո՞ւ ենք մեկ պարագայի վրա կենտրոնանում, չէ՞ որ օրինազանցությունը պատճառ է դառնում ամենայն դժբախտության: Երբ օրինազանց վարորդը հարբած նստում է ղեկին ու գնում մարդկանց մահվան պատճառ դառնում, այս ամենը որտեղի՞ց է գալիս՝ օրինազանցությունից: Լինի մարզպետ, թե պարզ վարորդ: Ուր չկա օրենք, բարոյականության մասին խոսելն ավելորդ է»:
