1 մլն շնչի հաշվով կորոնավիրուսով վարակման ցուցանիշը Հայաստանում կրկին աճել է

ԵՐԵՎԱՆ, 8 ՀՈՒՆԻՍԻ, Tert.am: Հայաստանում կորոնավիրուսով վարակման ցուցանիշը 1 մլն շնչի հաշվով հունիսի 8-ին աճել է 66-ով՝ կազմելով 4497: Այս մասին վկայում են worldometers.info կայքի՝ իրական ժամանակում թարմացվող տվյալները:

Վարակման դեպքերը՝ 1 մլն բնակչի հաշվով

1. Հայաստան – 4497

2. Ռուսաստան – 3266

3. Իրան – 2071

4. Թուրքիա – 2030

5. Ադրբեջան – 777

6. Վրաստան – 204

Թեև նախորդ օրերի համեմատ տվյալի աճն այնքան էլ մեծ չէ, մեր երկիրը շարունակում է այս ցուցանիշով առաջատարը լինել տարածաշրջանում:

1 մլն շնչի հաշվով կորոնավիրուսային հիվանդությունից մահացության ցուցանիշով (71) Հայաստանը տարածաշրջանում դարձյալ երկրորդն է Իրանից (100) հետո: Այս առումով երրորդը տարածաշրջանում Թուրքիան է (56), այնուհետև հաջորդում են ՌԴ-ն (41), Ադրբեջանը (9), Վրաստանը (3):

Հիշեցնենք, որ Հայաստանում հունիսի 8-ի դրությամբ հաստատվել է կորոնավիրուսով վարակման 195 նոր դեպք, վարակվածների ընդհանուր թիվը հասել է 13 325-ի: Մեկ օրում մահացել է 11 մարդ, իսկ մահվան ընդհանուր դեպքերի թիվը հասել է 283-ի:

Նշենք, որ այսօր կայացած ասուլիսի ժամանակ ՀՀ առողջապահության նախարար Արսեն Թորոսյանը շեշտեց, որ հունիս 8-ին արձանագրված վարակման դեպքերի թիվը ցածր է, քանի որ հետազոտություն իրականացնող հիմնական լաբորիատորիան այսօր «կանգնած է եղել պրոֆիլակտիկայի»: