Գրանդ փղիկի ժանիքների վարակը կբուժեն լավագույն մասնագետները

րևանի կենդանաբանական այգի երկօրյա պաշտոնական այցով եղել են Թբիլիսիի կենդանաբանական այգու տնօրեն Զուրաբ Գուրիելիձեն, Թբիլիսիի կենդանաբանական այգու գործառնությունների գծով մենեջեր Թոմաս Գոշաձեն և Թբիլիսիի այգու EAZA խորհրդատու (մենթոր) Մարջո Հոդեմեքերը, ով Նիդերլանդների Ամերսֆուրթ կենդանաբանական այգու ավագ խորհրդատուն է: Ինչպես տեղեկացնում են Երեւանի կենդանաբանական այգուց, այցի ընթացքում քննարկվել են այգիների ապագա համատեղ ծրագրերը: Հյուրերի հետ քննարկումների ժամանակ մեծ ուշադրության է արժանացել Գրանդը՝ Երևանի կենդանաբանական այգու միակ փիղը: Մարջո Հոդեմեքերը, ով փղերի’ ավելի քան 40 տարվա փորձ ունեցող մասնագետ է, շատ տպավորված էր փղի ազատավանդակի վերակառուցման ընթացիկ աշխատանքներից:

«Գրանդ Քենդի» հայ-կանադական համատեղ ձեռնարկության օժանդակության շնորհիվ Գրանդ փղի վերակառուցված ազատավանդակը կհամապատասխանի անվտանգության կանոններին և փղի խնամքի համար նախատեսված բոլոր պայմաններին: Մարջո Հոդեմեքերը նաև շեշտել է, որ Երևանի կենդանաբանական այգու փղին լավ են խնամում, չնայած որ Գրանդը դեռևս ունի ժանիքների վարակ, որը հիմնովին չբուժելու դեպքում փիղը կարող է լրջորեն հիվանդանալ և ավելացրել է, որ EAZA-ին կտեղեկացնի այս խնդրի մասին և անձամբ կհոգա փղերի լավագույն անասնաբույժների և ատամնաբուժական մասնագետների այցը Երևա? ? կազմակերպելու համար: Այնուամենայնիվ, անգամ լավագույն պրոֆիլակտիկ բուժումները չեն կարող բացառել կենդանիների հիվանդությունները, այսպես օրինակ’ Եվրոպայի լավագույն կենդանաբանական այգիներում կենդանիների անկումը հասնում է տարեկան գրեթե 15%-ի, մինչդեռ Երևանի կենդանաբանական այգում անկումը կազմում է տարեկան շուրջ 1.5%: Այս հարցին Մարջո Հոդեմեքերը պատասխանել է. «Կենդանիները նույնպես կենդանի արարածներ են, որոնք ունենում են բնական մահ: Ազատության մեջ նորածինների միայն 15%-ն է, որ հատում է մեկ տարեկանի սահմանը, քանի որ վայրի բնության մեջ շատ են կենդանիներին սպառնացող վտանգները: Հաճախ դժվար է լինում նաև կենդանու հիվանդության ախտորոշումը, քանի որ կենդանիները չեն կարող խոսել, բացատրել և միայն իրենց վարքագծի շնորհիվ կարող են ահազանգել որևէ խնդրի մասին: Հանրությունը պետք է գիտակցի, որ սա ամենևին էլ կենդանաբանական այգու անձնակազմի անփութությունը չէ և որ այգու աշխատակիցները անհնարը հնարավոր են դարձնում կենդանիների բարեկեցությունն ու անհրաժեշտ բուժումն ապահովելու համար»:

Երկու կենդանաբանական այգիներն էլ Կենդանաբանական այգիների և ակվարիումների եվրոպական ասոցիացիայի (EAZA) թեկնածու-անդամ են, որոնց համագործակցությունը սկսվել է 2013-ի ապրիլից, երբ Երևանի կենդանաբանական այգու տնօրեն Ռուբեն Խաչատրյանը պաշտոնական այցով Թբիլիսիի կենդանաբանական այգում էր: Առաջին հանդիպման արդյունքում այգիների միջև ստորագրվել էր Փոխըմբռնման հուշագիր, ըստ որի այգիները կենդանիների բարեկեցության և բազմացման նպատակով պարտավորվում են իրականացնել կենդանիների փոխանակում այգիների միջև նվիրատվության հիմունքներով, առանց որևէ ֆինա նսական պարտավորվածության, որի շրջանակներում Թբիլիսիի կենդանաբանական այգուց Երևանի կենդանաբանական այգին զեբր, կապիկներ և թռչուններ էր ձեռք բերել: