0.1 C
Yerevan

Այսօր Գարեգին Բ Ամենայն հայոց կաթողիկոսի ծննդյան տարեդարձն է

Նմանատիպ

Բացահայտվել է պետական դավաճանության դեպք

ՀՀ ԱԱԾ-ն հայտարարում է, որ ՀՀ քաղաքացի, ՊՆ N...

Հաագայի դատարանում քննվում է Հայաստանի հայցն ընդդեմ Ադրբեջանի

Արդարադատության միջազգային դատարանում մեկնարկել է Հայաստանի և Ադրբեջանի միջև դատավարական...

Ծառայակիցը Ա.Ա.-ին ամրակցված ինքնաձիգը լիցքաթափելիս արձակել է մեկ կրակոց. նա ձերբակալվել է․ ՔԿ

ՀՀ քննչական կոմիտեի զինվորական քննչական գլխավոր վարչության իններորդ կայազորային...

Այսօր Ն.Ս.Օ.Տ.Տ. Գարեգին Բ ծայրագույն պատրիարքը և Ամենայն Հայոց կաթողիկոսի ծննդյան տարեդարձն է: Վեհափառ Հայրապետն այսօր դարձավ 70 տարեկան, սակայն նրա մասնավոր ցանկությամբ հոբելյանական 70-րդ տարեդարձը չի նշվելու և որևէ միջոցառում չի իրականացվելու: «Ամենայն Հայոց Հայրապետն այս առիթով իր օրհնությունն ու բարեմաղթանքներն է հղում համայն մեր ժողովրդին և աղոթում Հայաստան և Արցախ հայրենի մեր աշխարհի խաղաղության, ապահով և անվտանգ կյանքի համար», – նախօրեին լրատվամիջոցներին տեղեկացրել է Մայր Աթոռի տեղեկատվական համակարգի տնօրեն Վահրամ ավագ քահանա Մելիքյանը։

Ն.Ս.Օ.Տ.Տ. Գարեգին Բ ծայրագույն պատրիարքը և Ամենայն Հայոց կաթողիկոսը Հայ առաքելական եկեղեցու 132-րդ կաթողիկոսն է 1999թվականից: Գարեգին Բ Ամենայն Հայոց կաթողիկոսը (ավազանի անունով` Կտրիճ Ներսիսյան) ծնվել է 1951թ. Արմավիրի մարզի Ոսկեհատ գյուղում:

Նախնական կրթությունն ստացել է Ոսկեհատ գյուղում։ 1965թ. ընդունվել է Մայր Աթոռ Սուրբ Էջմիածնի Գևորգյան Հոգևոր Ճեմարան։ 1970թ. դեկտեմբերի 25-ին ձեռնադրվել է սարկավագ։ 1971թ. գերազանց առաջադիմությամբ ավարտելով Հոգևոր ճեմարանը՝ նշանակվել է տեսչի օգնական՝ միաժամանակ ճեմարանում դասավանդելով «Նոր Կտակարան»։

1972թ., ձեռամբ Գերաշնորհ Տ. Տիրան արքեպիսկոպոս Ներսոյանի, ձեռնադրվել է կուսակրոն քահանա՝ վերանվանվելով Գարեգին աբեղա։ 1972թ. ուսումը շարունակել է Վիեննայի համալսարանի Աստվածաբանական ֆակուլտետում։ 1975թ. նշանակվել էԳերմանիայի հայ համայնքի հոգևոր հովիվ ու շարունակել է աստվածաբանական ուսումը Բոննի համալսարանում։ 1979թ. ուսանել է Զագորսկիում՝ Ռուս Ուղղափառ Եկեղեցու Հոգևոր Ակադեմիայի ասպիրանտուրայում։

1980թ. նշանակվել է Արարատյան Հայրապետական թեմի Առաջնորդական փոխանորդի օգնական, 1983թ. ապրիլին՝ Առաջնորդական Փոխանորդ։ Նույն տարվա հոկտեմբեր ամսին ձեռնադրվել է եպիսկոպոս, իսկ 1992թ. ստացել արքության պատիվ և տիտղոս։

1989 թ. Արարատյան Հայրապետական Թեմի հովանու ներքո Տ. Գարեգին արքեպիսկոպոս Ներսիսյանը հիմնել է Սևանի Վազգենյան Դպրանոցը։

1992թ. նրա ջանքերի շնորհիվ մայրաքաղաքում գտնվող նախկին պիոներ-պալատներից երեքը վերակազմավորվել են իբրև Հայորդյաց տներ, որտեղ հազարավոր երեխաներ ստանում են հոգևոր ու գեղագիտական կրթություն։

1990թ. Արարատյան Հայրապետական Թեմում հիմնել է Քրիստոնեական դաստիարակության կենտրոնը, որը համակարգում է Եկեղեցու կողմից թեմի տարածքում իրականացվող քրիստոնեական դաստիարակությունը՝ թվով 56 հանրակրթական դպրոցներում։

1990թ. Նորին Սրբությունը Գերագույն Հոգևոր Խորհրդի անդամ է։

1995թ. կաթողիկոսական ընտրության ժամանակ Տ. Գարեգին արքեպիսկոպոս Ներսիսյանը հավանական թեկնածուներից մեկն էր։ Ընտրության երրորդ փուլում նա հանեց իր թեկնածությունը՝ հօգուտ Մեծի Տանն Կիլիկիո Գարեգին Ա Կաթողիկոսի։

1998թ.Գարեգին Ա Կաթողիկոսի կողմից նշանակվել է Կաթողիկոսական Ընդհանուր փոխանորդ։

1999թ. հոկտեմբերի 27-ին Ազգային-Եկեղեցական սրբագումար ժողովում Տ. Գարեգին արքեպիսկոպոս Ներսիսյանն ընտրվել է Ծայրագույն Պատրիարք և Կաթողիկոս Ամենայն Հայոց՝ նոյեմբերի 4-ին ստանալով Կաթողիկոսական ձեռնադրություն և օծում։

Գարեգին Բ Հայրապետի գահակալությունից հետո նորոգվել և կառուցվել են բազմաթիվ եկեղեցիներ։ Եկեղեցաշինական հսկայածավալ աշխատանքներն առ այսօր արդյունավետորեն շարունակվում են ի Հայաստան և ի սփյուռս աշխարհի: Ուստի պատահական չեն մի առիթով Ամենայն Հայոց կաթողիկոսի կողմից ասված այս խոսքերը. «Ազգի և Աստծո կամոք մենք մեր անձը խոնարհեցրինք` հայրապետական ծանր լուծը մեր ուսերին վերցնելու: Այդ քայլը կատարելիս ամենևին մեր անձի նկատմամբ ունեցած վստահությունը չէր, որ առաջնորդեց մեզ նման հանձնառության, այլ առավել այն սերը, այն հավատը, որ ունեն մեր ժողովրդի զավակունք հանդեպ Հայաստանյայց Առաքելական Ս. Եկեղեցին ու Մայր Աթոռ Ս. Էջմիածինը, հանդեպ մեր հայրերի սրբազան հավատքը և նրանց հոգևոր ժառանգությունը»:

Գահակալության առաջին իսկ տարում Վեհափառ Հայրապետը հիմանդրել է Գարեգին Ա-ի անվան Աստվածաբանական-հայագիտական կենտրոնը, որի հարուստ գրադարանը մեծապես նպաստում է Մայր Աթոռի միաբանների գիտական և աստվածաբանական մտքի զորացմանը։ Կենտրոնում աշխատելու և գրականության հարուստ հավաքածուից օգտվելու հնարավորություն է ընձեռվել նաև հայ և օրտարազգի մտավորականությանը։ Գարեգին Բ Հայրապետի գահակալության օրոք Գյումրիի ընծայարանը, Սևանի Վազգենյան դպրանոցը և Գևորգյան հոգևոր ճեմարանը մեծ առաջընթաց են ապրել:

Հոգևոր-կրթական հաստատությունների հետ սերտ աղերս ունեն Հայորդյաց տները։ Հմուտ ուսուցիչների և մանկավարժների ջանքերով առավել զարգանում են Հայորդյաց տներ հաճախող երեխաների ու պատանիների ստեղծագործական ունակությունները, միաժամանակ նրանք ստանում են նաև քրիստոնեական դաստիարակություն:

Times.am-ի խմբագրակազմը ջերմագին շնորհավորում է Վեհափառ Հայրապետին ծննդյան տարեդարձի առիթով: Նորին Սրբությանը մաղթում ենք քաջառողջություն և հոգևոր անխախտ եռանդ:

spot_imgspot_img
spot_imgspot_img

Նմանատիպ

Նմանատիպ

Բացահայտվել է պետական դավաճանության դեպք

ՀՀ ԱԱԾ-ն հայտարարում է, որ ՀՀ քաղաքացի, ՊՆ N...

Հաագայի դատարանում քննվում է Հայաստանի հայցն ընդդեմ Ադրբեջանի

Արդարադատության միջազգային դատարանում մեկնարկել է Հայաստանի և Ադրբեջանի միջև դատավարական...

Ծառայակիցը Ա.Ա.-ին ամրակցված ինքնաձիգը լիցքաթափելիս արձակել է մեկ կրակոց. նա ձերբակալվել է․ ՔԿ

ՀՀ քննչական կոմիտեի զինվորական քննչական գլխավոր վարչության իններորդ կայազորային...