Ռուս խաղաղապահներն ապահովել են 400 մեքենայի անվտանգ երթևեկությունը դեպի Արցախ

ԵՐԵՎԱՆ, ԴԵԿՏԵՄԲԵՐԻ 18, Times․am: Ռուս խաղաղապահները մեկ օրում ապահովել են ավելի քան 400 մեքենայի անվտանգ երթևեկությունը Լաչինով դեպի Արցախ։ Այս մասին հայտնում է ՌԴ ՊՆ մամուլի ծառայությունը։

Ռուսական խաղաղապահ զորակազմի ներկայացուցիչ Իվան Պադալկան հայտնել է, որ զորախմբի դիտակետերում հսկիչ-անցագրային ռեժիմ է գործում։ Անհրաժեշտության դեպքում վարորդին խնդրում են դուրս գալ մեքենայից, որպեսզի ստուգեն մեքենայի սրահը։

Ռուսաստանի խաղաղապահ ուժերը 27 դիտակետ ունեն Լեռնային Ղարաբաղում և Լաչինի միջանցքում: Ռուս խաղաղապահներն մշտադիտարկում են իրականացնում, հսկում հրադադարի պահպանման ռեժիմը, ապահովում մեքենաների և մարդկանց անվտանգ մուտքն ու ելքը Լաչինի միջանցքով:

Դիտակետերը հագեցած են ժամանակակից լուսադիոդային լուսարձակներով, անխափան էլեկտրասնուցման աղբյուրներով։