Ուկրաինայի առաջնության 25-րդ տուրում մրցաշարային աղյուսակի առաջատար Դոնեցկի «Շախտյորը» միավորներ կորցրեց:
«Հանքափորները» հյուրընկալվել էին «Դնեպրին»: Հանդիպման հաշիվն արդեն 13-րդ րոպեին դաշտի տերերից բացեց Մատեուսը: Առաջին խաղակեսում «Շախտյորը» գոլով չկարողացավ պատասխանել, և թիմերն ընդմիջման գնացին 1:0 հաշվի պայմաններում:
Երկրորդ կեսի 60-րդ րոպեին Չեբերյաչկոն սեփական տուգանային հրապարակում խախտեց կանոնները Ֆերնանդինոյի նկատմամբ, ինչին հաջորդեց մրցավարի կողմից 11 մետրանոցի նշանակետի ցույց տալը: Տուգանային հարվածն անվրեպ իրացրեց Դարիո Սրնան` այդպիսով ձևակերպելով հանդիպման վերջնական հաշիվը:
«Դնեպր»-«Շախտյոր»` 1:1
Նշենք, որ Հայաստանի ազգային հավաքականի կիսապաշտպան Հենրիխ Մխիթարյանը, ինչպես և սպասվում էր, իր թիմի մեկնարկային կազմում էր և մասնակցեց ամբողջ հանդիպմանն` ունենալով հաջողության հասնելու մի քանի հնարավորություններ:
Այս խաղից հետո «հանքափորները» 70 միավորով շարունակում են գլխավորել մրցաշարային աղյուսակը, իսկ «Դնեպրը» 49 միավորով 4-րդն է:
